Elimizde PTR test ótkizýdiń táýliktik qýattylyǵy 100 myńǵa jetti
NUR-SULTAN. QazAqparat – Elimizde koronavırýs boıynsha testten ótkizýdiń táýliktik qýattylyǵy 100 myńǵa jetti, dep habarlaıdy QazAqparat tilshisi.
«Bıyl vırýsty zerthana deńgeıinde anyqtaý kórsetkishi edáýir jaqsardy. Pandemııa bastalǵannan keıin biz PTR ádisi arqyly koronavırýsty anyqtaý jumysyn osy jyldyń sáýirinde bastaǵan edik. Biz sol tusta táýligine 6 myń adamdy testten ótkizýge bolatyn 19 zerthana jumys istep turǵan edi. Alaıda búgingi tańda koronavırýs anyqtaý testin eldegi 132 zerthana men 48 bıologııalyq materıaldardy jınaý beketinen ótkizýge bolady. Qazirgi tańda Qazaqstanda koronavırýs boıynsha testten ótkizý qýattylyǵy táýligine 100 myńǵa jetti», - dedi QR Densaýlyq saqtaý birinshi vıtse-mınıstri Marat Shoranov OKQ-da ótken baspasóz máslıhatynda.
Onyń aıtýynsha búgingi tańda Qazaqstanda 5 mıllıonǵa jýyq PTR-test júrgizilgen. Kúnine zerthanada 40 myńnan astam adam PTR-testten ótýde.
