Elimizde PTR-test óndirisi táýligine 28 myń danaǵa jetkizilmek

NUR-SULTAN. QazAqparat – Osy jyldyń mamyr aıynyń ortasynda koronavırýs ınfektsııasy boıynsha PTR-testileý kóleminiń óndirisi táýligine 28 myńǵa deıin ósedi. Bul týraly Dárilik zattardy, medıtsınalyq buıymdardy jáne tehnıkany saraptaý ulttyq ortalyǵynyń bas dırektory Arnur Nurtaev málim etti, dep habarlaıdy QazAqparat tilshisi.

«Qazirgi tańda bizde rekordtyq deńgeıde – táýligine 15 myń PTR-test shyǵarylyp jatyr. Biz mamyr aıynyń ortasyna deıin testileý sanyn táýligine 28 myńǵa deıin arttyrýdy josparlap otyrmyz. Alaıda munyń bári testileý qajettigine baılanysty bolady», - dedi Arnur Nurtaev Densaýlyq saqtaý mınıstrliginiń Facebook paraqshasynda sóılegen sózinde.

Ortalyq basshysynyń aıtýyna qaraǵanda qazirgi tańda Qazaqstanda 600 myńǵa tara PTR-test satylyp alynyp qoıǵan.

«Búgingi kúni Qazaqstan COVID-19 dıagnostıkasy boıynsha PTR test-júıesin paıdalanyp keledi. Olar iri qytaılyq óndirýshiden satylyp alynady. Testterdiń saqtalý merzimi DDSU talaptaryna saı. Atap aıtqanda test-júıelerdi paıdalaný úshin biz olardy Dúnıejúzilik densaýlyq saqtaý uıymy usynǵan testtermen salystyryp kórdik. Test-júıelerdiń sapasy jaqsy ekenine kózimiz jetkennen keıin ony qoldan bastadyq. Olar 99 paıyzdyq deńgeıde nátıjeni kórsetti», - dedi Arnur Nurtaev.

Sonymen qatar ol PTR-ádisteme men ekspress-testterdiń aıyrmashylyǵyn túsiný kerektigin aıtyp ótti.

«PTR-testter vırýstyń bar-joǵyn anyqtaıdy. Al ekspres-testter aǵzada vırýsqa qarsy antıdeneniń bar-joǵyn aıqyndap beredi. Adamnyń aǵzasynda antıdene aýyryp bolǵannan keıin paıda bolady. Ekspres-testter aýrýdy ótkergennen keıingi dıagnostıkada qoldanylady. COVID-19 dıagnostıkasyna ekspres-testter jaramaıdy», - dedi Arnur Nurtaev.