Elimizde páter tonaý 30 paıyzǵa tómendedi
NUR-SULTAN. QazAqparat – 2021 jyldyń 4 aıynda elimizde páter tonaý 30 paıyzǵa qysqardy. Bul jaıynda QR ІІM Krımınaldyq polıtsııa departamenti bastyǵynyń orynbasary Qanat Nurmaǵambetov málim etti, dep habarlaıdy QazAqparat tilshisi.
«Tolyqtaı alǵanda, qabyldanǵan is-sharalar sońǵy 5 jyldyń ishinde páter urlyǵynyń sanyn 67 paıyzǵa tómendetýge múmkindik berdi. Sonymen qatar oń úrdis osy jyly da baıqalyp otyr. Bıyl 4 aıdyń ishinde olardyń sany 30 paıyzǵa qysqardy. Buǵan qosa, mundaı qylmystardy ashý 13 paıyzǵa jaqsardy», - dedi ol Іshki ister mınıstrliginiń baspasóz qyzmeti alańynda ótken brfıng barysynda.
Sonymen qatar ol Іshki ister mınıstrligi páter urlyǵynyń aldyn alýǵa baǵyttalǵan respýblıkalyq is-sharany turaqty túrde ótkizetindigin aıtty.
«Krımınogendik ahýalǵa aldyn alý is-sharalary oń yqpalyn tıgizip otyr. Urlyqqa qarsy is-qımyl jónindegi vedomstvolyq baǵdarlamany júzege asyrý aıasynda turǵyn úılerdiń aýlalaryna 54 myńnan astam beınebaqylaý kamerasy ornatyldy. Sonymen qatar turǵyndardyń bastamasymen 14 myńnan astam qurylǵy qoıyldy. Bul jumys jalǵasyp jatyr», - dedi Qanat Nurmaǵambetov.
