Elimizde paranyń mólsheri ósti - Atameken UKP

NUR-SULTAN. QazAqparat - Elimizde sybaılas jemqorlyqqa qatysy bar kásipkerler sany azaıǵanmen, paranyń mólsheri ósken. Bul týraly elordada ótken respýblıkalyq kásipkerler forýmynda aıtyldy, dep habarlaıdy QazAqparat tilshisi.

«Biz 2019 jyly sybaılas jemqorlyq deńgeıin anyqtaý úshin naqty áleýmettik zertteý júrgizdik. Zertteý qorytyndysy boıynsha paranyń ortasha mólsheri, sybaılas jemqorlyq mólsheri eń joǵary aımaqtar, parany kóp alatyn memlekettik organdar anyqtaldy», - deıdi «Atameken» QR Ulttyq kásipkerler palatasy Basqarma tóraǵasynyń mindetin atqarýshy Erbol Ústemirov.

Onyń aıtýynsha, sybaılas jemqorlyqpen qatysy bar kásipkerler sany tómendegen.

«Sybaılas jemqorlyqpen qatysy bar kásipkerler sany tómendegenmen, jalpy paranyń ortasha mólsheri ósken. 2018 jyly paranyń ortasha mólsheri 193 myń teńge bolsa, 2019 jyldyń qorytyndysy boıynsha 205 myń teńgege ósken», - deıdi ol.

Sondaı-aq, Erbol Ústemirov 2019 jyldyń qorytyndysy boıynsha sybaılas jemqorlyq eń kóp aımaqtardy atady.

«Batys Qazaqstan, Mańǵystaý, Atyraý oblysy, Qyzylorda olystarynda sybaılas jemqorlyq deńgeıi joǵary bolsa, Qostanaı, Qaraǵandy, Shyǵys Qazaqstan oblystary men Nur-Sultan qalasynda sybaılas jemqorlyq deńgeıi tómen» - dep atap ótti Erbol Ústemirov.