Elimizde «Ózińdi jáne óz jaqyndaryńdy qorǵa! Ekpe jasat!» uranymen eýropalyq ımmýnızatsııalaý aptalyǵy ótedi

Bul jaıynda búgin Salaýatty ómir saltyn qalyptastyrý problemalarynyń ulttyq ortalyǵy dırektorynyń orynbasary Tatıana Slajneva arnaıy ótken baspasóz máslıhatynda málim etti.

T. Slajnevanyń aıtýynsha, 2005 jyldan bastap, DDU Eýropalyq aımaqtyq bıýrosynyń, BBU Balalar qorynyń bastamasy boıynsha, eýropalyq ımmýnızatsııalaý aptalyǵy ótkizilip keledi. Al Qazaqstan Eýropanyń basqa elderimen birge 2006 jyldan bastap osyndaı is-sharalarǵa belsendi qatysýda eken. «Ondaǵy negizgi maqsat - turǵyndarǵa ımmýnızatsııalaýdyń mańyzy men paıdasy týraly kóbirek aqparat berý, halyqty vaktsınalaýmen qamtý deńgeıin arttyrý», -deıdi T. Slajneva.

Atalǵan aptalyq aıasynda elimizde dóńgelek ústelder, aqparattyq paraqshalar ázirleý, taratý, kezdesýler men suhbattar ótkizý qarastyrylǵan. Sonymen qatar apta ishinde respýblıkadaǵy densaýlyq saqtaý mekemelerinde jedel baılanys jelileri, senim telefondary jumys isteıtin bolady.