Elimizde ózin ózi emdeýmen aınalysqysy keletinderge arnalǵan konsýltatsııalyq ortalyq qurylady
ASTANA. 13 shilde. QazAqparat - Elimizde ózin ózi emdeýmen aınalysqysy kelgenderge arnalǵan konsýltatsııalyq ortalyq qurylady.
Bul týraly búgin Úkimet otyrysynda QR Densaýlyq saqtaý mınıstri Salıdat Qaıyrbekova málim etti.
«Halyq úshin ózin ózi emdeýge jaýaptylyq jáne emdik quraldardy tıimdi paıdalaný boıynsha konsýltatsııalyq-bilim berý ortalyǵy qurylatyn bolady. Sonymen qatar Farmatsevtıka naryǵyn, baǵany, qosalqy áserdi, emdik quraldaryn tıimdi paıdalaný ortalyǵy qurylmaq», - dedi ol.
Mınıstrdiń túsindirýinshe, osy jáne basqa da sharalar Memleket basshysy N.Nazarbaevtyń «Qazaqstannyń áleýmettik jańǵyrtylýy: Jalpyǵa Ortaq Eńbek Qoǵamyna qaraı 20 qadam» maqalasynda berilgen tapsyrmalardy oryndaý úshin qoldanylatyn bolady. Esterińizge sala keteıik, Elbasy QR Densaýlyq saqtaý mınıstrligine 2012 jyldyń aıaǵyna deıin, emdik quraldardy paıdalanýǵa qatysty turǵyndardyń habardarlyǵy deńgeıin arttyrýdyń pármendi tetikterin engizýdi tapsyrǵan bolatyn.
«Dári-dármekpen qamtamasyz etý máselesi jan-jaqty qaralatyn bolady. Biz Ulybrıtanııa men Germanııanyń halyqty aqparattandyrý jáne dárilik formýlıardy qosa alǵanda dári-dármekpen qamtamasyz etýdegi oń tájirıbesin zerdeleýdemiz», - dedi S.Qaıyrbekova.
