Elimizde ózderin ateıst nemese agnostık dep sanaıtyndar 10 paıyzdy quraıdy

ASTANA. QazAqparat - QR Din isteri jáne azamattyq qoǵam mınıstrliginiń Din isteri komıteti janynan qurylǵan Din isteri jónindegi respýblıkalyq aqparattyq-nasıhattaý toby Shyǵys Qazaqstan oblysynda bolyp, jıyn ótkizdi. Onda din salasyndaǵy ózekti máseleler, atap aıtqanda dinı saýattylyqty arttyrý, destrýktıvti dinı qaǵıdalarǵa, ekstremızmge qarsy kúres sharalary talqylandy, dep habarlaıdy QazAqparat.

QR Prezıdenti Ákimshiligi Іshki saıasat bóliminiń sektor meńgerýshisi  Ǵalym Shoıkın basqosýda din salasynda ózekti dep tanylǵan máselelerdi jıynda keńinen talqylaýmen shektelmeı, ony kópshilikke túsindirý, nasıhattaý mańyzdy ekenin atap ótti.  Onyń aıtýynsha, elimizdegi dinı aýdıtorııaǵa syrtqy jaǵymsyz kúshterdiń yqpaly artyp otyr. Ásirese  aqparat keńistiginiń ashyqtyǵy jáne jahandaný protsesteriniń keri ózgeristeri onyń ishinde ınternet, áleýmettik jeliler jáne basqa da baılanys quraldary ıdeologııalyq turǵydan basymdyqqa ıe bolǵan. Ásirese, bul kórinis din salasynda aıqyn ańǵarylady.

«Búgingi tańda ózderin ateıst nemese agnostık dep sanaıtyndar 10%-dy qurap otyr. Al shamamen 75% halyq ózderin dinge senetinderin biraq, jamaǵatpen júıeli túrde dinı rásimderdi jasamaıtyndyqtaryn aıtqan. Dinge senip, barlyq dinı rásimderdi únemi oryndaıtyndar 16% -dy quraıdy. Eldegi dinshildik deńgeıiniń ósýi, radıkaldy ıdeologııanyń keńinen qanat jaıýyna múmkindik beredi», - dedi Ǵalym Nurmaǵambetuly. Onyń sózine qaraǵanda, dinı saýatsyzdyqdyń týyndaýyna eń aldymen, dinı bilim - jan-jaqty tárbıe men jáne de saıası saýattylyq da qajet.

«Memleket azamattardyń quqyqtyq ar-ojdan bostandyǵyn qamtamasyz etip, elimizde tirkelgen dinı birlestikterdiń alańsyz jumys isteýi úshin qolaıly jaǵdaı jasap otyr. Osy rette, Elbasynyń jarlyǵymen ázirlenip, bekitilgen, asa mańyzdy strategııalyq qujat sanalatyn Qazaqstan Respýblıkasynyń din salasyndaǵy memlekettik saıasatynyń 2017 - 2020 jyldarǵa arnalǵan Tujyrymdamasy jasaldy. Bul qujat - memleket pen din arasyndaǵy júıeni qalyptastyryp, qarym-qatynastar pen kózqarastardy aıqyndaıdy. Sonymen qatar, dinniń qoǵam aldyndaǵy, ómirdegi rólin belgilep bermek», ̶ dedi QR Prezıdenti Ákimshiligi Іshki saıasat bóliminiń sektor meńgerýshisi. Onyń sózinshe, Tujyrymdamada bekitilgendeı, kanondyq jáne dinı máselelerge memleket aralaspaıdy. Biraq, zańnyń qatań saqtalýyn qadaǵalaıdy.

Budan bólek, aqparattyq-túsindirý tobynyń músheleri dástúrli emes dinı aǵymdardyń jaqtaýshylarymen turaqty túsindirý jumystaryn jalǵastyrý kerektigin atap ótti. Mundaı jumystar óz kezeginde Respýblıka aýmaǵy boıynsha óz tıimdiligin kórsetip otyr. ShQO-da Óskemen qalasyndaǵy Ortalyq meshitte, Semeı qalasyndaǵy - «Bir munaraly Tas meshit» jáne de «Tynybaıda» ótken kezdesýler men basqosýlar osyǵan mysal bola alady. Sondaı-aq, osyndaı kezdesýler túzetý mekemelerindegi sottalǵandarmen onyń ishinde dástúrli emes dinı aǵymdardyń jaqtaýshylarymen de bolyp ótti. 

Delegatsııa quramynda Qazaqstan Respýblıkasy Prezıdenti Ákimshiligi, Din isteri komıtetiniń Mádenıet jáne din halyqaralyq ortalyǵy, Ǵylymı-zertteý jáne taldaý ortalyǵynyń músheleri, sarapshy-teolog mamandar, qoǵamdyq uıym músheleri bar.