Elimizde óz shyǵynyn jabatyn 500 meshit bar - Múftııat
ASTANA. QazAqparat - Qazaqstan Respýblıkasyndaǵy meshitterdiń bes júzi aqsha túsetin, ıaǵnı, óz shyǵynyn ózi jabatyn meshit bolyp sanalady. Búgin «Ekspert» klýbynyń otyrysyna qatysqan QMDB tóraǵasynyń orynbasary, naıb múftı Serikbaı qajy Oraz «meshitterde quran oqyǵanda, halyq tastaıtyn aqsha qaıda ketip jatyr?» degen suraqqa jaýap berdi.
«Óte oryndy suraq. Bul elimizdiń árbir azamaty úshin mańyzdy suraq. Bizdiń elimizde 2500 meshit bar. Sonyń ishinde, bizdiń esebimizdegi 500 meshit aqsha túsetin meshitter bolyp sanalady. Qalǵan meshitterdi, mysaly, aýyldaǵy meshitterdi alyp qarasaq, jylda Orazanyń aldynda bir ret molda arqyly jınap beretin bir ǵana pitir sadaqasy bolady. Ol kelesi jylǵa deıin moldanyń, azanshynyń jalaqysyn tóleýge, meshittiń kommýnaldyq shyǵyndaryn tóleıtin aqsha retinde esepteledi»,-dep habarlady ımam.
Al, joǵaryda aıtqan qarjy únemi túsip otyratyn 500 meshittiń esep-qısaby Qazaqstan Musylmandar Dinı basqarmasynyń qoǵamdyq keńesiniń nazarynda eken.
«Qazaqstan Musylmandary dinı basqarmasynyń 21 saıty bar, sol saıttarda atqaryp jatqan jumystardy, qarjy-sharýashylyq baǵytyndaǵy jumystarymyzdy jarıalap otyramyz. Biraq, eń bastysy, munda bir mynandaı ereje bar: bizdiń kúndelikti kelip otyrǵan jamaǵatymyzdyń ishinde 11 adamnan quralǵan revızııalyq komıssııanyń músheleri bar. Qarjy jaǵdaıymyz ashyq bolý úshin, byltyrdan bastap elektrondy tremınaldar engizdik. Astana meshitterinde termınaldar ornattyq, birte birte jetildirip jatyrmyz. ıAǵnı, halyqtyń sanasynda eshqandaı kúmándi nárse bolmaý kerek. Eger naqty esep kerek bolsa, biz ony nazarlaryńyzǵa usyna alamyz. «Meshitke mıllıardtaǵan aqsha túsedi» degen oıdan arylý kerek. Qazir bizde 3600 maman bar bolsa, solaryń 2000-ǵa tartasyna Qazaqstannyń orta deńgeıdegi kórsetkishine saı, aılyq bere almaı otyrmyz. Qazirde «Nur Múbarak» ýnıversıtetin bitirgen alty júzden astam din mamanynyń kóbi basqa salada jumys istep júr»,-dedi S.Oraz.
