Elimizde ótkir tynys joldary vırýstary jáne tumaýmen baılanysty jaǵdaı turaqty
ASTANA. Qazannyń 12-si. QazAqparat /Aıdar Ospanalıev/ - Búgingi tańda eldegi ótkir tynys joldary vırýstary men tumaýǵa baılanysty jaǵdaı turaqty. Bul týraly búgin jýrnalıstermen bolǵan brıfıngte Densaýlyq saqtaý mınıstrliginiń Sanıtarlyq-epıdemıologııalyq qadaǵalaý komıteti tóraǵasynyń orynbasary Aıjan Esmaǵambetova málim etti.
Ol taratqan málimetterge qaraǵanda, qazannyń 1-i men 11-i aralyǵynda respýblıkada 24 myń 332 ótkir tynys joldary vırýsyn juqtyrý jaǵdaıy tirkelip, tumaý áli tirkelmegen. «Ótken jyldyń sáıkes merzimimen salystyrǵanda, bıyl aýrýlardyń 3,6 paıyzǵa tómendegendigi baıqalady. Aýrýlarǵa qarsy dári egý jumystarynyń vırýstardyń taraýynyń aldyn alýdyń basty sharalary ekendigi barshaǵa málim. Osy sebepti memleket bıýdjetinen bul baǵytqa 365 mıllıon teńge bólinip, olarǵa qajetti vaktsınalar satyp alyndy. Qazannyń 1-nen bastap olar elimizdiń barlyq aımaqtaryna jiberildi jáne osy ýaqyttan bastap, turǵyndarǵa egý jumystary júrgizilýde», - dedi A.Esmaǵambetova.
Onyń sózinshe, bıýdjet esebinen az qamtylǵan otbasylarǵa tumaýǵa qarsy egý jumystary turǵylyqty meken-jaı boıynsha emhanalarda júrgizilýde. Osy toptyń arasynda sozylmaly ókpe aýrýyna shaldyqqan, júrek qan-tamyr aýrýymen aýyratyn, ımmýndyq qorǵanysy tómen balalar men jasy 60-tan asqan qarttar bar. Al bul topqa kirmegen azamattar aqyly túrde egiledi. Búginde bir vaktsınanyń quny 1 myń 500 teńgeden 2 myń teńgege deıingi aralyqta.
Komıtet tóraǵasynyń orynbasary elimizde vaksıgrıpp, flarıks jáne ınflıývak sııaqty Germanııa, Frantsııa jáne Nıderlandy elderinde shyǵarylǵan 3 túrli vaktsına egiletindigin aıtady. Olardyń barlyǵy Búkiálemdik densaýlyq saqtaý uıymy tarapynan sertıfıkattalǵan. «Qazirgi kezde elimiz boıynsha 49 myń 317 adam egilgen. Tumaýǵa qarsy dárileý jumystaryn qarasha aıynyń 15-inde aıaqtaý josparlanyp otyr», - dedi A.Esmaǵambetova.
