Elimizde ótken saılaý búkil Ortalyq Azııa aımaǵynda demokratııalyq jaǵynan eń jaqsy saılaý dep baǵalanyp otyr- Memleket basshysy
ASTANA. 8 sáýir. QazAqparat /Aıdar Ospanalıev/ - «Elimizde ótken saılaý tek qazirgi Qazaqstan tarıhynda ǵana emes, sarapshylar aıtqandaı búkil Ortalyq Azııa aımaǵynda uıymdastyrylý jaǵynan da, demokratııalyq jaǵynan da eń jaqsy saılaý dep baǵalanyp otyr», - dedi búgin Astanadaǵy Táýelsizdik saraıynda ótken ulyqtaý rásiminde Qazaqstan halqyna Ant berip, jańa prezıdenttik merzimge resmı kiriskennen keıin sóılegen sózinde QR Prezıdenti Nursultan Nazarbaev.
«Qazaqstan búkil álemge halqymyzdyń kúsh-qýaty men birligin tanytyp otyr. Elimizde ótken saılaý tek qazirgi Qazaqstan tarıhynda ǵana emes, sarapshylar aıtqandaı búkil Ortalyq Azııa aımaǵynda demokratııalyq jaǵynan eń jaqsy uıymdastyrylǵan saılaý dep baǵalanyp otyr. Turaqtylyq pen gúldenýge daýys bere otyryp, árbir qazaqstandyq óziniń bolashaǵyn, óziniń otbasy men elimizdi, óziniń Otanyn qoldady. Men búgin 1991 jyldyń jeltoqsan aıynda alǵashqy búkilhalyqtyq saılaýdan keıin, birinshi ret halyq aldynda Ant bergen kezimdi esime alyp turmyn. Ol ýaqytta bizdiń aldymyzda múldem basqa mindetter turǵan. Biz qulaǵan ımperııanyń bólshegi ǵana boldyq. Bizdi ol ýaqytta "qaıtip halyqtyń qarnyn toıdyrsaq, qaıtip ónerkásip toqyraýynyń aldyn alsaq bolady, elge jalaqylaryn men zeınetaqylaryn ýaqytynda tólep turý úshin qajetti qarjyny qaıdan alsaq, túrli qaýip-qaterlerge toly kúrdeli ómirde qalaısha jerimizdi saqtap qalsaq?" degen másele ǵana tolǵandyrdy»,-dedi Memleket basshysy.
Sondaı-aq sózinde, ol ýaqytta elimizdiń óziniń ulttyq valıýtasy, strategııalyq rezervteri, eń quryǵanda shekarasyn jaýlardan qorǵaıtyn áskerdiń de bolmaǵandyǵyn atap ótti. «Osynyń barlyǵy nebári 20 jyl buryn ǵana bolǵandyǵyn kózge elestetý qıyn. Ol ýaqytta men úshin kún tártibinde - ekonomıka jáne tek ekonomıka degen mindet turǵan edi. Bizge qaıtip kún kórýdiń amalyn oılastyrý qajet bolatyn. Ashyǵyn aıtqanda, ol ýaqytta bizge áıteýir tiri qalýdyń amalyn tabý qajet edi. Keńes Odaǵynyń qorqynyshy bolashaqqa degen senimdi tyǵyryqqa tiredi. Halyqtyń mundaı sezimin tek onyń áleýmettik jaǵdaıyn ońaltyp, osy maqsattyń aldynda kúsh biriktirý arqyly ǵana seıiltýge bolatyn edi. Tap osy halyq senimi men memleketimizdiń bolashaǵy bizge qıyndyqtardy eńserý úshin qýat berdi. Biz qıyndyqtardy eńserip qana qoımaı, jahandyq ómirmen yqpaldasqan tıimdi ekonomıka jasaı aldyq. Biz elimizdi myqty áleýmettik, daǵdarysqa qarsy baǵyttalǵan sharalar arqyly álemdegi eń kúrdeli ekonomıkalyq daǵdarystan shyǵara bildik. Biz osy jetistikke ózge elder ózderiniń áleýmettik mindettemelerin qysqartyp, keı jaǵdaıda tipti odan bas tartqan kezinde qol jetkizdik», - dedi Prezıdent.
