Elimizde ótetin kezekten tys Prezıdent saılaýyn 1059 baıqaýshy baqylaıtyn bolady
ASTANA. 29 naýryz. QazAqparat /Aıdar Ospanalıev/ - Ortalyq saılaý komıssııasy 3 sáýirge taǵaıyndalǵan kezekten tys Prezıdent saılaýyn baqylaý úshin kelgen shet memleketter men halyqaralyq uıymdardyń taǵy 9 baıqaýshysyn tirkedi.
Bul týraly Ortalyq saılaý komıssııasynyń keshe keshqurym ótken kezekti májilisinde málim boldy.
Otyrysta osy másele boıynsha baıandama jasaǵan OSK-nyń múshesi Tatıana Ohlapkovanyń aıtýynsha, osylaısha elimizde ótetin kezekten tys Prezıdent saılaýyn 1059 baıqaýshy baqylaıtyn bolady. «Olardyń arasynda Eýropadaǵy qaýipsizdik jáne yntymaqtasty uıymynyń Demokratııalyq ınstıtýttar men adam quqyqtary jónindegi bıýrosynyń mıssııasynan - 357, Táýelsiz memleketter dostastyǵy uıymynyń mıssııasynan - 426, Shanhaı yntymaqtastyq uıymynyń mıssııasynan -13, 4 halyqaralyq uıymnan -100, 25 shet memleketten -163 baıqaýshy tirkeldi»,-dedi OSK múshesi.
Sondaı-aq ol sózinde, kezekten tys saılaýda sheteldik jáne halyqaralyq baıqaýshylarmen qatar elimizdiń Syrtqy ister mınıstrliginde turaqty tirkelgen nemese qysqa merzimge tirkelgen sheteldik buqaralyq aqparat quraldarynyń ókilderi de baqylaıtyndyǵyn atap kórsetti. «Qazirgi tańda Syrtqy ister mınıstrliginde turaqty túrde 90 sheteldik aqparat quralynyń ókili tirkelgen. Búgin baıqaýshylardan ótinish qabyldanatyn sońǵy kún. Sondyqtan kezekten tys saılaýǵa qatysatyn baıqaýshylardyń jalpy qorytyndysyn túngi 24-00-den soń qorytyndylaýǵa bolady»,-dedi T.Ohlapkova.
