Elimizde osteoporoz dertine shaldyqqandar sany kóbeıýde
ASTANA. 20 qazan. QazAqparat /Marlan Jıembaı/ - Búgin Búkilálemdik osteoporozben kúres kúni. Osyǵan oraı eldordadaǵy № 8 qalalyq emhanada atalǵan aýrýdyń aldyn alý máselelerine arnalǵan ashyq esik kún ótýde.
Astana qalalyq salaýatty ómir saltyn qalyptastyrý ortalyǵynyń bólim bastyǵy Jánnat Sársenbekovtiń atap ótýinshe, is-shara halyq arasynda osy osteoporoz dertiniń keń aýqymda taralyp otyrǵandyǵyn kórsetýge baǵyttalǵan. Keýektelýdiń, ıaǵnı aǵzadaǵy zat almasýynyń, qaltsıı almasýynyń buzylýy saldarynan súıektiń synǵyshtyǵyna ákeletin bul dert búginde 50 jastan asqan áıelderde kóbirek kezdesip otyr. Máselen, statıstıkalyq derekterge qaraǵanda, Eýropa keńistiginde árbir 30 sekýnd saıyn osteporoz saldarynan súıektiń synýy tirkeledi eken. Al jalpy álemde 50 jastan asqan árbir 3-shi áıel, sonymen qatar árbir 5-shi erkek osy dertke shaldyǵady. Boljam boıynsha taıaý 50 jyldyń ishinde osteoporozǵa shaldyqqandar sany 2 esege ulǵaımaq. Aıta keterligi, elimizde de travmatologııa bólimine túsken árbir 5-shi naýqas osteporozben baılanysty súıek synýy dıagnozymen emdeledi eken.
«Bul derttiń aldyn alýdyń negizgi sharasy - durys tamaqtaný, temeki shegip, araq ishiýden jáne basqa da jat qylyqtardan arylý, sportpen shuǵyldanyp, salaýatty ómir saltyn ustaný», - dedi J.Sársenbekov.
Onyń atap ótýinshe, qala halqyna osy derttiń saldaryn túsindirý úshin kóshelerdegi, qoǵamdyq kólikterdegi túrli-tústi dıspleılerde beınerolıkter kórsetilip, bilikti mamandar osteporozdyń negizgi belgileri jáne onyń aldyn alý sharalaryn nasıhattaýda.
«Bul dert sońǵy 5 jylda elimizde kóbeıip kele jatyr. Oǵan halyq arasynda durys nasıhattalmaýy, bundaı aýrýdyń bar ekendigi týraly aqparattardyń az bolýy sebep bolyp otyr», - dedi ol.
Aıta keteıik, búgingi sharanyń ótýine Astana qalalyq densaýlyq saqtaý basqarmasy, qalalyq salaýatty ómir saltyn qalyptastyrý ortalyǵy jáne Jedel medıtsınalyq kómek kórsetý ortalyǵy uıytqy bolyp otyr.
