Elimizde ósimdikterdi qorǵaýdy qarjylandyrý júıesi ózgermek
ASTANA. QazAqparat - Qazaqstanda ósimdikterdi qorǵaý baǵytyndaǵy qarjylandyrý júıesin ózgertý kózdelýde, dep habarlaıdy QazAqparat.
Bul tyń ózgerister jaıly Parlament Májilisinde «QR keıbir zańnamalyq aktilerine agroónerkásiptik keshendi retteý máseleleri boıynsha ózgerister men tolyqtyrýlar engizý týraly» zań jobasyn tanystyrǵan QR Aýyl sharýashylyǵy mınıstriniń birinshi orynbasary Qaırat Aıtýǵanov aıtty.
«Jyl saıyn ósimdikterdi óńdeýge bıýdjetten 2,2 mlrd teńge qarajat bólinedi. Onyń ishinde pestıtsıdterdi satyp alýǵa 0,7 mlrd ketse, qalǵan 1,5 mlrd. teńge (65%) satyp alynǵan pestıtsıdterdi saqtaý, tasymaldaý jáne qoldaný boıynsha qyzmetterge jumsalady. Bul tásil bıýdjet qarajatynyń tıimsiz jumsalyp jatqanyn kórsetip otyr. Sondaı-aq, bul jol zalaldandyrylǵan aýmaqty fıtosanıtarııalyq sharalarmen tolyqtaı qamtı almaıdy», - deıdi Qaırat Aıtýǵanov.
Onyń aıtýynsha, ósimdikterdi qorǵaý kartasynda ár oblys boıynsha egisterdiń fıtosanıtarııalyq jaǵdaıy belgilengen. Aramshóptiń basý alańdary anyqtalyp, aramshóp boıynsha 4,7 mln ga aýmaq, al zııankester men aýrýlar boıynsha 1,5 mlnga aýmaq óńdeýmen qamtylmaǵan.
«Budan basqa pestıtsıdterdi satyp alýdyń ortalyqtandyrylǵan protsedýralary óńdeý protsesseriniń sozylyp ketýine ákep soqtyrady. Bıýdjet boıynsha pestıtsıdter teńgemen satylyp alynatyndyqtan, naryqtyq baǵalar ózgergende shuǵyl áreket etýge múmkindik bermeıdi», - deıdi vıtse-mınıstr.
Atalǵan kemshilikterdi joıý maqsatynda QR AShM zań jobasy arqyly bıýdjet qarajaty esebinen ósimdikterdi qorǵaý jáne karantıni boıynsha sharalardy qarjylandyrýdyń jańa jolyn usynyp otyr. Demek, pestıtsıdterdi satyp alýǵa memlekettik bıýdjetten bólek, zań jobasy maquldansa aýyl sharýashylyǵy ónimderin óndirýshiler de qarajat jumsaıtyn bolady. Al AShM shegirtkelerge jáne memlekettik jer qoryndaǵy taralǵan karantındik obektilerge (jupsyz jibek kóbelegi, karantındik aramshópter) qarsy sharalardy burynǵydaı óz mindetinde qaldyrmaq.
