Elimizde órtten 600-den astam adam ajal qushyp, 6 mlrd. teńgeden astam materıaldyq shyǵyn keldi
ASTANA. 11 shilde. QazAqparat - Jyl saıyn respýblıkada 18 myńnan astam órt tirkeledi. Odan kelgen materıaldyq shyǵyn 6 mlrd. teńgeden astam.
Órt saldarynan 600-den astam adam qaza bolady. Bul týraly búgin Astanada QR Tótenshe jaǵdaılar mınıstrliginiń ujymy men Májilis depýtattarynyń kezdesýi barysynda Órtke qarsy qyzmet komıtetiniń tóraǵasy Serik Áýbákirov málim etti.
Onyń sózine qaraǵanda, órtke qarsy memlekettik mekemelerdiń bólimsheleri dabyl boıynsha 50 myńnan astam shaqyrtýǵa barady. Onyń ishinde 16 myńnan astamy órt boıynsha jáne 3,5 myńy apattyq-qutqarý jumystaryna baılanysty.
Komıtet basshysynyń aıtýynsha, órttiń 70 paıyzdan astamy jeke sektorǵa tıesili, 10 paıyzǵa jýyǵy kólik quraldaryna, 6 paıyzy orman jáne dala órtteri, 4 paıyzy óndiristik nysandardyń úlesinde, sondaı-aq 3 paıyzy saýda jáne ákimshilik ǵımarattarda jáne 7 paıyzy túrli maqsattardaǵy nysandarǵa qatysty.
