Elimizde órt qaýpiniń joǵarlap turýyna baılanysty «Qazavıaormankúzeti» mekemesi áýeden orman alqaptaryna úsh ese baqylaýdy júzege asyrýda
ASTANA. Tamyzdyń 21-i. QazAqparat /Marlan Jıembaı/ - Qazirgi ýaqytta elimizde «Qazavıaormankúzeti» mekemesi órt qaýpiniń joǵary deńgeıi oryn alyp otyrǵan orman alqaptarynda úsh ese avıatsııalyq baqylaýdy júzege asyrýda. Bul týraly búgin QR Tótenshe jaǵdaılar mınıstrlignde ótken selektorlyq keńes barysynda QR Aýyl sharýashylyǵy mınıstrligi Orman jáne ań sharýashylyǵy komıtetiniń tóraǵasy Erlan Nysanbaev málim etti.
Atalǵan mekemeniń búkil avıabólimsheleriniń barlyq jeke quramy kúsheıtilgen áskerı daındyqqa kóshirilgendigin atap ótken E.Nysanbaevtyń sózine qaraǵanda, órt týyndaǵan jaǵdaıda azamattardyń habarlasýy úshin tabıǵatty qorǵaý mekemelerinde arnaı telefon nómirleri jumys isteıdi. Sonymen qatar ormandardaǵy órt qaýpiniń kúsheıip turýyna oraı barlyq tabıǵatty qorǵaý mekemeleriniń qurylymdyq bólimshelerinde, orman sharýashylyqtarynyń fılıaldarynda tilsiz jaýdyń aldyn alý is-sharalarynyń oryndalýyna baqylaý jasaıtyn jaýapty tulǵalar bekitilgen.
Orman jáne ań sharýashylyǵy komıtetiniń tóraǵasynyń aıtýynsha, sondaı-aq órt qaýpiniń joǵary sanaty oryn alyp otyrǵan «Ertis ormany», «Semeı ormany» memlekettik tabıǵı orman rezervattarynda túngi ýaqytta da kezekshilik uıymdastyrylǵan.
