Elimizde orman qory men aǵash otyrǵyzýdy qadaǵalaýǵa arnalǵan mobıldi qosymsha ázirlendi
NUR-SULTAN. QazAqparat – Qazaqstanda orman qoryn damytý, saqtaý jáne ondaǵy aǵashtar sanyn kóbeıtý maqsatynda mobıldi qosymsha jasaldy. Bul týraly QR Ekologııa, geologııa jáne tabıǵı resýrstar vıtse-mınıstri Álııa Shalabekova málim etti, dep habarlaıdy QazAqparat tilshisi.
«Qazaqstan — shaǵyn ormandy memleket. Máselen, elimizdiń orman qorynyń jalpy aýdany 30 mln gektardy quraıdy, ıaǵnı el aýmaǵynyń 11 paıyzyn orman alyp jatyr. Ormandy alqaptar týraly aıtar bolsaq. Mysaly, Qyzylorda jáne Jambyl oblystarynda negizinen sekseýil ósedi. ShQO men Almaty oblystarynda maıqaraǵaı, samyrsyn, balqaraǵaı jáne shyrsha aǵashy basym», - dedi A.Shalabekova OKQ-de ótken baspasóz máslıhatynda.
Vıtse-mınıstrdiń aıtýynsha, Prezıdent tapsyrmasyna sáıkes 2025 jylǵa deıin el aýmaǵynda 2 mlrd aǵash otyrǵyzylsa, 2030 jylǵa qaraı elimizde ormandy alqap kólemi 5 paıyzǵa artady.
«OrmanMap» dep atalatyn mobıldi qosymsha jasaldy. Ol qosymsha elimizdegi orman qory men memlekettik shekarasy týraly derekter, Sondaı-aq, ár óńirdegi ormandardyń kólemi jáne oǵan aldaǵy ýaqytta otyrǵyzylatyn aǵash túrleri men onyń sany kórsetilgen. Jáne de Memleket basshysy mindet etip qoıǵan, 2 mlrd aǵash otyrǵyzý protsesine qatysty ınfografıkamen tanysýǵa bolady. Búginde atalǵan mobıldi qosymsha shtattyq rejımde jumys istep tur», - deıdi ol.
Buǵan deıin vıtse-mınıstr bıyl el kóleminde 130 mln túp aǵash kósheti otyrǵyzylǵanyn aıtty.
