Elimizde orman kartalary tsıfrlandyrylyp jatyr

NUR-SULTAN. QazAqparat – Qazaqstanda ormandy zańsyz kesý faktileri ǵaryshtyq monıtorıng arqyly anyqtalyp jatyr. Bul týraly Ortalyq kommýnıkatsııalar qyzmetinde ótken baspasóz máslıhatynda QR Tsıfrlyq damý, qorǵanys jáne aeroǵarysh ónerkásibi mınıstrligi Aeroǵarysh komıtetiniń tóraǵasy Baýbek Oralmaǵambetov málim etti, dep habarlaıdy QazAqparat tilshisi.

«Ekologııa mınıstrligine qarasty orman sharýashylyǵy jáne janýarlar dúnıesi komıtetimen birlesip elimizdegi orman kartalary tsıfrlandyryldy. Ózderińiz biletindeı orman qory memlekettiń baqylaýynda jáne ol ǵaryshtyq monıtorıng arqyly júzege asyrylady. Bizdegi bar qazirgi derekter boıynsha Qazaqstanda 18,6 mln ga orman alqaby bar. Ǵaryshtyq monıtorıng arqyly ormandy baqylap qana qoımaı, órt qaýpiniń aldyn alýǵa da bolady. Sondyqtan da elimizdegi orman kartalary tsıfrlandyryldy. Sondaı-aq, ormanǵa qatysty ekinshi problema, ol zańsyz aǵash kesý. Endigi ýaqytta bul quqyqbuzýshylyqty da ǵaryshtyq monıtorıng arqyly qadaǵalaýǵa múmkindik bar», - dedi Baýbek Oralmaǵambetov.

Komıtet basshysynyń aıtýynsha, elimizde orman kesý protsesi ǵaryshtyq monıtorıng arqyly tirkeledi. Al onyń qanshalyqty zańdylyǵyn quzyrly organdar anyqtaı jatady.

«Biz ǵaryshtyq monıtorıng nátıjesin ıaǵnı derekterdi quzyrly organdarǵa jiberemiz. Odan arǵy isti ózderi qolǵa alady. Bıylǵy orman resýrstary monıtorıngine kelsek. Elimizde jalpy aýdany 18,6 mln ga ormannyń vektorlyq kartasy tsıfrlandyryldy. Sonymen qatar 2 641 aǵash kesý polıgony anyqtaldy. Jáne 90 myń gektar órt oshaǵy belgilendi», - deıdi ol.