Elimizde oralmandardy beıimdeý jáne kiriktirýdiń úsh ortalyǵy jumys isteıdi
ASTANA. Qazannyń 29-y. QazAqparat /Marlan Jıembaı/ - Shetten kelgen aǵaıyndardy qoǵamdyq ortaǵa beıimdeý - bul psıhologııalyq beıimdeý, ony ortaǵa sińirý. Bul pikirdi Oral qalasynyń turǵyny qoıǵan saýalǵa oraı QR Eńbek jáne halyqty áleýmettik qorǵaý mınıstrligi Kóshi-qon komıtetiniń tóraǵasy Qabylsaıat Ábishev www.bnews.kz portalynda ótken Online-konferentsııa barysynda bildirdi,
dep habarlaıdy QazAqparat.
Orys jazýshysynyń bir kitabyn mysalǵa alǵan komıtet tóraǵasy tipti bir úıden ekinshisine qonys aýdarý barysynda da adamnyń búkil otbasynda, onyń qyzmetinde, tipti baıýynda da ózgeris bolatyndyǵyn atap ótti. Sonymen qatar, qytaıdyń Fen-Shýı atty iliminde de úıdegi jıhazdy ózgertip qoıǵannyń ózinde-aq adam psıhologııasynda aýytqýlar bolatyndyǵy aıtylyp, myńdaǵan jyldar boıy zerttelip kele jatqandyǵyn alǵa tartqan ol shet elden kóship kelý ońaı emestigin jetkizdi.
«Kóship kelgen adamnyń ornalasýy, dúnıe-múlik jınaýy, materıaldyq jaǵdaıyn jaqsartýy qıynǵa soǵady. Sondaı-aq psıhologııalyq ortaǵa beıimdelýi, tamaǵyna, aýasyna, kórshi-qolańyna, sózine, sol jerdiń dástúrine beıimdelý óte úlken másele. Memleket osy máseleni qolǵa alyp otyr. Qazir bizde 3 úlken beıimdeý, kiriktirý ortalyǵy jumys isteýde. Olar Shymkentte, osy qalanyń mańyndaǵy Aqsýkent aýylynda jáne Qaraǵandy qalasynda ornalasqan. Atalǵan ortalyqtar 150-200 otbasyn qabyldaı alady. Ol jerlerde kelgen azamattarǵa barlyq jaǵdaı jasalynǵan. Onda Qytaıdan, Túrkııadan, Aýǵanstannan kelgen azamattar kırılıtsany, qazaq tilin bilmeıtinderi qazaq tilin úırenedi», deıdi Q.Ábishev.
Sondaı-aq osy ortalyqtar alty aı boıy dánekershi, tiginshi, baǵdarlamashy sııaqty mamandyqtarǵa da úıretedi. Osy ýaqyt aralyǵynda olardyń qujattary daıyn bolyp járdemaqy, kómekaqylaryn alady.
