Elimizde ónerkásiptik grant engiziledi
Otyrysta «Ónerkásiptik saıasat týraly» jáne oǵan ilespe zań jobasy týraly baıandama jasaǵan mınıstri óndiris protsesine qatysty tyń jańalyqtarmen bólisti.
«Birinshi, yntalandyrýdyń jańa quraly - ónerkásiptik grant engizilýde. Ol birge qarjylandyrý negizinde óndiristi tehnologııalyq jańǵyrtýǵa beriledi. Ekinshi, memlekettik yntalandyrýdyń barlyq is-sharasy orta jáne joǵary bólinistegi ónim óndirýshilerge beriledi. Ádisteme negizinde ónimniń tıisti tizbesi bekitiledi. Osylaısha, qaıta óńdeýdi tereńdetýge nazar aýdarylady», - dedi ol.
Onyń atap ótýinshe, úshinshi, kórsetiletin is-sharalardyń tıimdiligin arttyrý úshin qarsy mindettemeler engiziledi. Olar bıznestiń alyp otyrǵan is-sharalarynyń túri men kólemin eskere otyryp aıqyndalady. Kásiporyn mindettemelerdi oryndamaǵan jaǵdaıda olardy oryndaý deńgeıine qaraı bıýdjet qarajatyn qaıtarýy tıis. Tórtinshi, básekege qabilettilikti arttyrý týraly kelisim engiziledi. Ol yntalandyrý is-sharalarynyń aralas paketin alýǵa múmkindik beredi. Besinshi, Ónerkásipti damytý qorynyń 3 paıyzdyq jeńildetilgen qarjy berý fýnktsııasy kózdelgen. Al naryqta ınvestıtsııalyq jobalardy nesıeleý mólsherlemesi 6 paıyz jáne odan joǵary.
«Altynshy -tsıfrlyq transformatsııalaý. Biz Germanııanyń Fraýnhofer ınstıtýtymen birlesip, júıequraýshy kásiporyndarǵa taldaý jasadyq. Olardyń árqaısysy tsıfrlyq transformatsııanyń qaı kezeńinde ekenin baǵaladyq. Kásiporyndarǵa tsıfrlyq transformatsııa júrgizý úshin qyzmetkerleriniń biliktiligin arttyrý jáne sheteldik mamandardy tartý, basqarýdyń jańa ádisterin engizý tetikteri kózdelgen. Jetinshi, jyldan jylǵa usynylatyn memlekettik yntalandyrý is-sharalarynyń tizbesi keńeıýde. Bul óz kezeginde bıznes úshin qolaıly jaǵdaılar jasaýdy talap etedi. Sondyqtan barlyq yntalandyrý is-sharalary «Elektrondyq úkimet» veb-portaly arqyly «bir tereze» qaǵıdaty arqyly júzege asyrylady. Bizdiń mınıstrlik yntalandyrý is-sharalary boıynsha úılestirýshi memlekettik organ bolady», - dedi Beıbit Atamqulov.
