Elimizde óndiriletin kómir kólemi qandaı

NUR-SULTAN. QazAqparat – Búgin Úkimet otyrysynda Indýstrııa jáne ınfraqurylymdyq damý mınıstri Qaıyrbek Óskenbaev elimizde kómir baǵysynyń turaqtylyǵyna qatysty atqarylyp jatqan jumystardy atady, dep habarlaıdy QazAqparat tilshisi.

«Inflıatsııaǵa qarsy den qoıý sharalarynyń kesheni aıasynda Mınıstrlik energııa óndirýshi uıymdardy qoljetimdi baǵamen kómirmen qamtamasyz etý jáne jańa ımportty almastyratyn jobalardy iske asyrý boıynsha sharalardy qamtydy. 2021 jyldyń qorytyndysy boıynsha elimizde shamamen 110 mln tonna kómir óndirildi. Onyń ishinde jyl saıyn 60 mln tonnasy energııa óndirýshi uıymdarǵa, 6 mln tonnaǵa jýyq ónerkásiptik kásiporyndarǵa jáne 10 mln tonnadan astam kommýnaldyq turmystyq qajettilikterge jóneltiledi», - dep toqtaldy Q. Óskenbaev.

Onyń aıtýynsha, qazir barlyq óńirler kommýnaldyq-turmystyq qajettilikterge kómirmen qamtamasyz etilgen. Óńirlerdiń barlyq kómir tuıyqtarynda kómir bar. Baǵasy turaqty.

Energetıkalyq sektorǵa kómirdi jóneltýdi negizinen bes iri kómir kompanııasy júzege asyrady, olar kelesi kólemdermen júzege asyrylady:

1) «Bogatyr Kómir» jaýapkershiligi shekteýli seriktestiniń tıeý kólemi 34,5 mln tonnany quraıdy, tıeýdiń jalpy kóleminiń úlesi – 58%;

2) «Vostochnyı» razrezi (ERG) tıep-jóneltý kólemi 13 mln tonna, úlesi 22%;

3) «Qazaqmys Koal» jaýapkershiligi shekteýli seriktestiniń tıeý kólemi 7 mln tonna, tıeýdiń jalpy kóleminiń úlesi 12%;

4) «Qarajyra» Aktsıonerlik qoǵamynyń tıep-jóneltý kólemi 5 paıyzdyq úlesimen 3,3 mln tonna jáne «ArselorMıttal Temirtaý» Aktsıonerlik qoǵamynyń tıep-jóneltý kólemi 2 mln tonna.

«Óndiriletin elektr energııasynyń ózindik qunyndaǵy kómir shyǵyndarynyń úlesi 18 paıyzdy quraıdy. Kómir óndirýshi kásiporyndarmen energetıkalyq sektor úshin baǵany ustap turý boıynsha tıisti jumys júrgizýdemiz. Temirjol tasymalynyń baǵasyn ustap turý boıynsha da osyndaı jumystar júrgiziletin bolady», - dedi mınıstr.