Elimizde ókpe ragy aýrýy seıilmeı tur
ALMATY. 3 jeltoqsan. QazAqparat /Ádilet Musahaev/- Qazirgi tańda shylym shegý, ekologııanyń lastanýy, sııaqty faktorlar ókpe ragy aýrýyna ákelýde.
Halyq árdaıym sportpen shuǵyldanyp, salaýatty ómir saltyn qalyptastyrsa, mundaı dertke shaldyǵa qoımaıdy. Bul jaıynda búgin Qazaq onkologııa ǵylymı-zertteý ınstıtýtynyń dırektory Jetkergen Arzyqulov Almatyda ótip jatqan "Ókpe ragyna qarsy birge kúreseıik" atty ǵylymı-tájirıbelik konferentsııa barysynda aıtty.
Onyń aıtýynsha, mundaı dertke Aqmola, Soltústik Qazaqstan, Shyǵys Qazaqstan oblystary men Almaty qalasy sııaqty óndiris oryndary kóptep ornalasqan aımaqtardyń turǵyndary jıi shaldyǵady eken. "Halyqtyń ókpe dertine shaldyǵýynyń aldyn alý maqsatynda memlekettik baǵdarlamalar iske asyrylyp jatyr. Shylym shegýdiń zııandy ekendigi, onyń sońy qaterli isik aýrýlaryna ákep soǵatyndyǵy jaıynda jarnamalyq rolıkter túsirilip, kóshedegi bılbordtarǵa jarnamalar ilindi"-deıdi J. Arzyqulov.
Sonymen qatar ol elimizde qaterli isikke shaldyǵýdyń aldyn alý jumystary belsendi júrgizilip otyrǵandyǵyn jáne onkologııalyq ortalyqtardyń sońǵy zamanaýı qurylǵylarmen jabdyqtalǵandyǵyn aıtyp ótti. "Qazan aıynda TMD elderi onkologtarynyń 6-sezdinde qazaqstandyq mamandardyń jetken jetistikteri eskerilip, 2012 jyly ótetin 7-sezdi Qazaqstanda ótkizý týraly sheshim qabyldandy", - dep atap ótti óz sózinde Jetkergen Arzyqulov.
Sondaı-aq ol osy dertti der kezinde anyqtap aldyn alý maqsatynda erteń qalamyzdaǵy 18 mekemede halyqty onkologııalyq tekserýden ótkizý ashyq esigi ótetindigin jarııalady. Almatydan bastaý alǵan bul ıgi is basqa oblystarda da óz jalǵasyn tabatyn bolady.
