Elimizde obyr dertin qarasoramen emdeý ádisi jolǵa qoıylmaq

«Shetel azamaty bolsam da, Qazaqstanda biz tórt jyl boıy jumys istep kelemiz. Qazaqstanda zamanǵa saı medıtsınalyq tehnologııalardy, noý-haýlardy paıdalana otyryp, halyqqa paıdaly bolý úshin tehnıkalyq qarasorany medıtsınalyq maqsatta paıdalanýdy jolǵa qoıýdy kózdep otyrmyz. Qazirgi tańda álem boıynsha AQSh, Izraıl, Germanııa, Kanadada onkologııalyq aýrýlarǵa dýshar bolǵan adamdardy tehnıkalyq qarasorany paıdalana otyryp emdeıdi. Meniń ózim de Qazaqstanda onkologııamen aýrýhanaǵa túsken edim. Biraq, maǵan Almatyda Qazaqstannyń dárigerleri emdep shyqty. Mine, sodan beri Qazaqstanǵa ózimdi qaryzdarmyn dep esepteımin», - deıdi «RAIS Medicann International» kompanııasynyń bas dırektory Zamık Rahımov Nazarbaev Ýnıversıtetiniń Medıtsına mektebinde ótken Tehnıkalyq qarasorany medıtsınalyq maqsatta paıdalaný boıynsha jahandyq forýmda.

Onyń aıtýyna qaraǵanda, tehnıkalyq qarasora onkologııa, dıabet, astma, parkınson, epılepsııa aýrýlaryn emdeýde óte paıdaly.

«Dálelderimiz jeterlik. Qazirgi tańda biz Úkimet múshelerimen kezdesip, kelissózder júrgizip jatyrmyz. Ol taraptan da bizge zor qoldaý bar. Nazarbaev Ýnıversıteti de bizge úlken qoldaý bildirýde. Qysqa ýaqyttyń ishinde memleket tarapynan qoldaý taýyp, bul jumysty jandandyramyz degen úmittemin. Alǵashqy satyda Almaty oblysynda tehnıkalyq qarasorany ósiretin jylyjaı men ony óńdeıtin zaýyt salýdy kózdeýdemiz. Sonymen birge, klınıka ashý mindeti tur. Klınıka 2020 jyldyń ekinshi toqsanynda ashylmaq. Ol emhanada onkologııalyq aýrýlarǵa, astma men dıabetke dýshar bolǵan patsıentterdi qabyldaıtyn bolamyz», - deıdi ol.

Zamık Rahımovtyń aıtýyna qaraǵanda, tehnıkalyq qarasorany paıdalaný hımııaterapııany azaıtyp, tabıǵı jolmen emdeýge múmkindik beredi.

«Máselen, patsıent bizge kelgende emhanada naqty dıagnoz qoıylady. Osyǵan qaraı, komponentterdi ázirleıtin bolamyz. Búgingi kúni Izraıl, AQSh pen Kanada eliniń tájirıbelerine súıene otyryp, osy amal-ádistiń 6 aıdyń ishinde oń áserin kórsetetinin anyqtadyq. Adamdardy qaýipti aýrýlardan qutqara otyryp, bizdiń laborotorııa Ortalyq Azııa ǵana emes, Reseıden patsıentter kelip emdeletin ortalyqqa aınalsa degen úmitimiz bar», - deıdi ol.

Qarasoranyń ózi QR Іshki ister mınıstrligi tarapynan baqylaýǵa alynǵan ósimdik ekeni belgili. Tehnıkalyq qarasorany ósirý zańnamalyq turǵyda qalaı retteledi? Atalmysh suraqqa jaýap bergen Zamık Rahımovtyń aıtýynsha, bul rette ızraıldik zańnamany negizge ala otyryp, elimizde tehnıkalyq qarasorany ósirip, óńdeýdi retteıtin zań jobasy ázirlenedi.

«ІІM-men birge zań jobasyn birge ázirleıtin bolamyz. Bul jerde tehnıkalyq qarasorany ósirýden bastap óńdeýge deıingi aýqymdy jumys ІІM-men retteletinin aıta ketkim keledi. Tipti qarasora ósiriletin jylyjaıda beınebaqylaý kamerasy ornatylyp, arnaıy kúzet qoıylady. Demek, bul jerde de damyǵan elderdiń tájirıbesin qoldanamyz», - deıdi Z.Rahımov.