Elimizde nesıe jáne basqa da qaryzyn tólemeı júrgen 7 mln boryshker bar

ASTANA. QazAqparat – 7 mln-nan astam otandasymyzdyń bereshegi bar. Onyń qatarynda, nesıe, mıkrokredıttik agenttikter aldyndaǵy qaryzy, kommýnaldyq tólem men alıment bar, dep habarlaıdy QazAqparat tilshisi.

«Búginde elimizde 7 mln-nan astam boryshker bar. Olar tek bank pen kollektorlyq agenttikterge qaryz emes, kommýnaldyq tólemder, alıment boıynsha da bereshekteri bar azamattar. Al bankter men mıkrokredıttik agenttikterdiń aldynda 1,5 mln adam bereshek. Tólemdi óteý merzimi 3 aıdan asyp ketse, ol azamat bereshekter tizimine engiziledi. Bereshek boıynsha máseleni kirister komıteti sotqa jetkizbeı sheshý amaldaryn usynady. Nátıje bolmaǵan jaǵdaıda sot arqyly sheshýge týra keledi», - dedi QR Qarjy vıtse-mınıstri Erjan Birjanov Senatta ótken dóńgelek ústel barysynda.

Onyń aıtýynsha, qazaqstandyqtardyń deni nesıe boıynsha bereshek.

«Bereshegi kóp óńirler qatarynda Túrkistan, Almaty oblysy jáne ShQO bar. Atalǵan óńirlerde halyq sany kóp, sondyqtan da qaryzdanýshylar molynan shoǵyrlanǵan», - deıdi ol.

QR Parlamenti Senatynyń depýtaty Sultanbek Mákejanovtyń málimdeýinshe, búginde 3 mln-ǵa jýyq adamnyń kommýnaldyq tólem boıynsha 20 mlrd teńge qaryzy bar.

Odan bólek, 791 myń adamnyń 20 mlrd teńgege salyq qaryzy ótelmegen.

Aıta ketsek, búgin Senat qabyrǵasynda azamattardyń tólem qabilettiligi jáne bankrottyǵy týraly zań jobasyn qabyldap, oryndalý protsesi talqylandy.

Buǵan deıin qarjy vıtse-mınıstri alıment keshiriletin qaryzdar qataryna jatpaıtynyn aıtty.

Sondaı-aq, Qazaqstanda bankrot mártebesin alǵan azamattarǵa 5 jylǵa deıin nesıe bermeý qaralyp jatyr.