Elimizde musylman áıelderge arnalǵan «SalNur» rýhanı-tanymdyq jýrnaly jaryq kórdi
ASTANA. Sáýirdiń 16-sy. QazAqparat /Marlan Jıembaı/ - Búgin elordada taıaýda jaryq kórgen «SalNur» áıelderge arnalǵan rýhanı-tanymdyq jýrnalynyń tanystyrylymy ótti.
«Bul Qazaqstandaǵy musylman áıelderge arnalǵan tuńǵysh jýrnal. Basylymdy jaryqqa shyǵarýymyzdyń negizgi maqsaty - qazaqstandyq qoǵamda rýhanı adamgershilik qaǵıdalaryn jańǵyrtýmen qatar musylman áıeliniń sulýlyǵyn, ázız ulylyǵyn pash etý», deıdi basylymnyń bas redaktory ári quryltaıshysy Gúlnár Adamova.
Otbasyndaǵy ana róliniń ereksheligine, ananyń ǵumyry, ómiri bala tárbıesimen tyǵyz baılanysty ekendigine toqtalǵan jýrnal redaktsııasy alqasynyń múshesi Tóleý Aımaǵanbetova «Sodyqtan jýrnalda biz osy máselege basa nazar aýdaryp, «balalar múıisi» degen aıdarmen balalarǵa arnalǵan maqalalar toptamasyn da basyp otyramyz», dedi óz sózinde. Bul oraıda basylym ıslam dinin jas jetkinshekter arasynda keńinen nasıhattaý, balalardyń ıslamı mádenıetin qalyptasyrý ári jamytý maqsatynda «Men musylman balasymyn» atty balalar baıqaýyn da jarııalap otyr.
Shara barysynda jýrnaldyń tusaýkeser rásimimen quttyqtaǵan Indýstrııa jáne saýda mınıstrli janyndaǵy «Halal» standarty boıynsha tehnıkalyq komıtettiń tóraǵasy Marat Sársenbaev «sharıǵat boıynsha jánnattyń kilti - namaz, namazdyń kilti - dáret, al negizinen shańyraqtyń tazalyǵy, adaldyǵy - ana. Sondyqtan analarǵa arnalǵan osyndaı jýrnaldyń shyǵyp otyrǵanyna óte qýanyshtymyn», dedi óz sózinde. M.Sársenbaev sondaı-aq ózi basshylyq jasap otyrǵan komıtet tarapynan da qoldaý kórsetip, halal standartyna, ındýstrııasyna, halal kásiporyndaryna qatysty jańalyqtardy berip otyrýǵa nıetti ekendigin jetkizdi.
Qazaq jáne orys tilderinde aıyna bir ret 3000 dana taralymmen jaryq kóretin jýrnaldan ıslamsha ómir súrý degen ne, qazirgi zamandaǵy musylman áıelderiniń dúnıetanym qandaı, onyń otbasy men bala tárbıesindegi alar orny sııaqty saýaldarǵa mol maǵlumat alýǵa bolady.
