Elimizde munaı ónimderi boıynsha tehnıkalyq reglamentti buzǵan kásiporyndarǵa 7 mıllıonǵa jýyq aıyppul salyndy

Bul týraly búgin 9 aıdyń qorytyndysyna arnalǵan baspasóz máslıhatynda QR Indýstrııa jáne jańa tehnologııalar mınıstrligi Tehnıkalyq retteý jáne metrologııa komıtetiniń tóraǵasy Ryskeldi Sátbaev málim etti.

Onyń atap ótýinshe, 9 aıda respýblıka boıynsha munaı ónimderin satýmen aınalysatyn kásiporyndarǵa 261 tekserý júrgizilip, nátıjesinde 173 buzýshylyq anyqtalǵan. «Munaı ónimderin tehnıkalyq retteý salasyndaǵy zańnama talaptaryn buzǵan kináli tulǵalarǵa qatysty jalpy somasy 6 mıllıon 785 myń teńge bolatyn ákimshilik jaza sharasy qabyldandy», - dedi ol.

R.Sátbaevtyń aıtýynsha, atalǵan tekserýdiń qorytyndysy boıynsha sáıkestik sertıfıkaty, markırovkasy joq, tehnıkalyq reglament talaptaryna sáıkes kelmeıtin jalpy somasy 413 mln. 435 myń teńgeni quraıtyn 317 partııa ónim satylýǵa tyıym salynǵan. «Negizgi buzýshylyqtar oktandy benzınderge qatysty bolyp otyr», - dedi komıtet tóraǵasy.