Elimizde munaı eksportyna eshqandaı kedergi joq - vıtse-mınıstr

ATYRAÝ. QazAqparat -  Qazaqstan munaıdy esh kedergisiz eksporttaı alady, dep habarlaıdy QazAqparat tilshisi QR Energetıka vıtse-mınıstri Maǵzum Myrzaǵalıevke silteme jasap.

«2018 jyly Qashaǵannan 12 mıllıon tonna munaı óndirýdi josparlap otyrmyz. Árıne, munymen shektelip qalmaımyz. Biz ken ornyn óńdeýdiń alǵashqy kezeńinde kele jatyrmyz. Ken ornynyń múmkindikterin keńeıtý boıynsha tujyrymdamany aıaqtaǵan soń, Qashaǵannan munaı óndirý kólemin arttyrýǵa kóshemiz. Atalmysh ken ornynyń bolashaǵy zor», - dedi M. Myrzaǵalıev.

«Bizde eksporttaıtyn baǵyttarymyz bar. Qashaǵan munaıy Kaspıı qubyr jelisi konsortsıýmynyń baǵyty boıynsha Qara teńizge jáne álemdik naryqqa jetkiziledi. Bizde Kaspıı baǵytyn damytý boıynsha arnaıy josparlar bar. Sondaı-aq, Aqtaý teńiz porty, Quryq porty arqyly Baký, Mahachkalaǵa tasymaldaýǵa múmkindik bar. Elimizdiń energııa resýrstaryn esporttaýda eshqandaı kedergiler kórip turǵan joqpyz», - dedi energetıka vıtse-mınıstri.

Eske salaıyq, osy kúnderi Atyraýda Soltústik Kaspıı jobasyna 25 jyl tolýyna oraı saltanatty sharalar ótip jatyr. Kaspıı teńizindegi qazaqstandyq sektordyń geologııalyq qory 12-17 mıllıard tonna dep baǵalanýda.