Elimizde múgedektik týraly anyqtama berý talaptary jeńildedi

NUR-SULTAN. QazAqparat – QR Eńbek jáne halyqty áleýmettik qorǵaý mınıstri Tamara Dúısenova múgedektik týraly proaktıvti qyzmet týraly aıtyp berdi, dep habarlaıdy QazAqparat tilshisi.

«Qazir múgedektikti belgileýge ótinish bildirgen azamattar men qoǵam tarapynan kýálandyrý protsesiniń ashyqtyǵyna qatysty shaǵym óte kóp aıtylady. Osy problemany sheshý úshin Memleket basshysynyń tapsyrmasyna sáıkes, múgedektikti belgileýdiń proaktıvti nemese «syrttaı kýálandyrý» formatyna kóshýdi bastadyq», - Tamara Dúısenova Úkimettiń búgingi otyrysynda.

Mınıstrdiń aıtýynsha, azamattardyń densaýlyǵy týraly málimet pen osyǵan baılanysty tirshilik qalybynyń ózgerýi jónindegi dáriger qorytyndysy medıtsınalyq aqparat júıesine engiziledi. Ondaǵy aqparat Eńbek mınıstrliginiń Múgedektigi bar azamattar týraly ortalyqtandyrylǵan málimetter bazasyna kelip túsedi.

«Buryn bazadan ony árkimniń turǵylyqty jerine joldaıtynbyz. Endi eshkimniń jeke málimetin kórsetpeı, avtomatty túrde úsh óńirdiń sarapshylar komıssııasyna jiberemiz. Komıssııanyń qorytyndysy negizinde sheshim qabyldanyp, ol sheshim azamattarǵa yńǵaıly formatta joldanýda. Búginge deıin 25 myńnan astam qujat nemese osy salada kórsetiletin memlekettik qyzmettiń 21 paıyzy osyndaı formatpen qaraldy», - deıdi T. Dúısenova.

Sonymen birge jumys qorytyndysy birqatar tyń múmkindikter bar ekenin kórsetken. Atap aıtqanda, azamattar medıtsınalyq-áleýmettik saraptama komıssııasyna usynatyn qaǵaz qujattardyń barlyq túrin tolyq alyp tastap, emhanalardy biryńǵaı tereze retinde aıqyndaý, aýrý túrleri boıynsha beıindi mamandardy saraptamaǵa tartý arqyly azamattardyń turmystaǵy shektelý dárejesin neǵurlym dál belgileý múmkin boldy.

Oǵan qosa, usynylatyn qyzmetter men tehnıkalyq quraldardyń naqty tizimin anyqtap, kómekke muqtaj ár azamatqa jeke ataýly ońaltý baǵdarlamasyn ázirleý múmkindigi paıda boldy.

«Bul baǵyttaǵy jumysty Densaýlyq saqtaý mınıstrligimen birge atqaryp jatyrmyz. 2023 jyldyń sońyna deıin medıtsınalyq-áleýmettik saraptama jumysyn túbegeıli ózgertip, osy saladaǵy qyzmettiń teń jartysyn proaktıvti formatqa kóshirýdi josparlap otyrmyz», - dedi Eńbek mınıstri.

Buǵan deıin Tamara Dúısenova elimizde 700 myńǵa jýyq múgedektigi bar adam turatynyn aıtqan edi.