Elimizde muǵalimder qashyqtyqtan jumys isteı alady
NUR-SULTAN. QazAqparat – Bilim jáne ǵylym mınıstri Ashat Aımaǵambetov muǵalimder óz úıinde qashyqtan jumys isteı alatynyn málimdedi, dep habarlaıdy QazAqparat tilshisi.
«Jalpy, elimizde 7300 mektep bar. Sol mektepterde balalardy kanıkýlǵa erterek shyǵardyq. 16 naýryzdan 5 sáýirge deıin kanıkýl jalǵasady. Kanıkýl kezinde muǵalimderdiń máselesi bar. Muǵalimderge úılerinde bolyp, qashyqtan jumys isteýine bolady. Biz osyny usynyp, barlyq bilim berý bólimderine jáne mektep dırektorlaryna osy aqparatty jetkizdik», -dedi mınıstr OKQ-da ótken baspasóz máslıhatynda.
Eske sala ketsek, Densaýlyq saqtaý mınıstri 14 naýryzda elordada ótken baspasóz máslıhatynda Eljan Birtanov Qazaqstanda eki adamnyń koronavırýs juqtyrǵanyn jetkizgen edi. Kóp ótpeı Mılan qalasynan Nur-Sultanǵa kelgen taǵy bir qazaqstandyqtan koronavırýs ınfektsııasy tabyldy.
Keıin Germanııadan ushyp kelgen Qazaqstannyń taǵy bir azamatynan koronavırýs anyqtaldy. Osylaısha bul dertke shaldyqqandar sany 4 adamǵa jetken edi.
