Elimizde monıtorıng toptarynyń jumys algorıtmi ózgerdi

NUR-SULTAN. QazAqparat –Monıtorıng toptarynyń jumys algorıtmine ózgerister engizildi. Bul týraly Qazaqstan kásipkerleriniń quqyqtaryn qorǵaý jónindegi ýákil Rústem Júrsinov málim etti, dep habarlaıdy QazAqparat.

«7 jeltoqsanda koronavırýs ınfektsııasynyń taralýyna jol bermeý jónindegi vedomstvoaralyq komıssııa monıtorıng top jumysynyń algorıtmin bekitken bolatyn. Degenmen monıtorıng toptary quramynyń ashyqtyǵy, tekserýler úshin negizder jáne olardy bıznes nysandarynda júrgizý tártibine qatysty birqatar másele ashyq kúıinde qalǵan edi. Biz bul olqylyqtardyń ornyn toltyrýdy usyndyq. Keshe, 19 jeltoqsanda, Úkimet jańartylǵan algorıtmdi usyndy», - dep jazdy Rústem Júrsinov Facebook paraqshasynda .

Rústem Júrsinov buryn monıtorıng toptarynyń nazaryn tek eń óreskel tártipbuzýshylyqtarǵa aýdarý týraly usynys aıtqanyn jazady. Jańa algorıtmde bul usynys eskerilgen, monıtorıng toptaryna bıznesti tek 5 talaptyń saqtalýy turǵysynan tekserý uıǵarylǵan. Olar:

1) jumys rejımi;

2) adamdar kóp jınalatyn is-sharalardy ótkizýden bas tartý;

3) áleýmettik qashyqtyqty saqtamaý;

4) maska rejımin saqtamaý;

5) kelýshiler sanynyń lımıtten asýy.

«Eger monıtorıng toby osy 5 tártipbuzýshylyqtyń bireýin anyqtasa, ol kásipkerge aıyppul sala almaıdy. Materıaldar sanıtarlyq dárigerdiń tekserýinsiz ákimshilik is júrgizý úshin SEQ-qa jiberiledi nemese shuǵyl habarlama jasalady. Al SEQ ınspektory kásipkerdi tekseredi. Ekinshi jaǵdaıda sanıtarlyq dáriger bıznes nysanyn tekserý paraǵynda qarastyrylǵan talaptardyń saqtalýyn tekseredi (qazirgi ýaqytta 24 talap bar, biraq jaqyn arada ony 20-ǵa deıin qysqartý josparlanýda)», -deıdi ol.

Rústem Júrsinov sonymen qatar engizilgen taǵy bir mańyzdy jańalyq - endi ákimdikter monıtorıng toptaryn tekserýge shyqpas buryn olardyń derbes quramyn óz saıttarynda jarııalaýǵa, al monıtorıng toptarynyń músheleri bar bolǵan jaǵdaıda qyzmettik kýálikterin kórsetýge mindetti bolatynyn atap ótti. Osylaısha, kásipkerler ózderin tekserýge zańdy baqylaý toby kelgenin bile alady.

Sondaı-aq algorıtmge reıdtik is-sharalar júzege asyrylatyn aýmaqtyń ýchaskesin monıtorıng tobynyń aldyn ala aıqyndap alýy týraly usynys engizilgen. Bul monıtorıng toptarynyń jumysyn tsıfrlyq baqylaýǵa negiz boldy. Tsıfrlyq monıtorıng olardyń qyzmetiniń ashyqtyǵyn arttyryp, sybaılas jemqorlyq táýekelderin tómendetedi. Ázirge tsıfrlyq monıtorıng pılottyq rejımde tek Túrkistan oblysynda ǵana júrgizilýde. Bul tájirıbe búkil elge taratylýy múmkin

«Eger sizge nemese sizdiń bıznesińizge qatysty monıtorıng tobynyń músheleri zańǵa qaıshy áreket jasaǵan bolsa, 1432 qysqa nómiri boıynsha UKP call center-ge habarlasyńyz», - deıdi Rústem Júrsinov.