Elimizde «Mohnatyı lapot» dep atalatyn jańa kınofestıval dúnıege keldi

Bul týraly atalmysh sharanyń uıymdastyrýshylary - Kıno úıi ókilderi Almatyda ótken arnaıy baspasóz máslıhatynda málim etti.

Festıvaldi ótkizý boıynsha bastamashyl toptyń múshesi Oksana Melnıkovanyń aıtýynsha, bul festıval amerıkandyq «Mohnatyı lapot» dep atalatyn balamaly fılmder kıno festıvaliniń syńary bolmaq.

«Qazaqstan qazirgi ýaqytta fılmderdi shyǵarý boıynsha rekordtyq kórsetkishke jetýge az qaldy. Árıne, otandyq kınonyń damyp jatqandyǵy qýantady. Biraq, kınolar sanynyń kóptigi sonshalyq, shyǵyp jatqan fılmderdiń kóbi «Eýrazııa» syndy halyqaralyq festıvalderge qatysa almaýda. Sondyqtan, kınematografıster men prokatshylar óziniń festıvalin taǵaıyndaýdy jón kórdi. «Mohnatyı lapot» «Eýrazııa» festıvaline ótpeı qalǵan, basqasha aıtqanda, nashar degen fılmderdi jınap, marapattamaıdy, ol sonymen qatar eń úzdik degen fılmderdi anyqtaıtyn bolady. Bul festıvaldiń mindeti men maqsaty - resmı tulǵalardyń ruqsat bermegen fılmderin úlken ekranǵa shyǵarý bolyp tabylady»,-dedi prodıýser Petr Novıkov.

Onyń aıtýynsha, bunymen qatar, festıvaldiń ekinshi mindeti de bar. «Ol - jeke sektorǵa ınvestıtsııa tartý maqsatynda kınematografıster men prokatshylardyń, sonymen qatar prodıýserlerdiń kúshin bir ortalyqqa shoǵyrlandyrý. Ózderińiz bilesizder, Gollıvýd jeke ınvestıtsııanyń arqasynda damydy. Al, kıno qazirgi ýaqytta bıznestik kózqaraspen qaraǵanda ınvestıtsııa salýǵa tartymdy sala. Oǵan «Qaırat chempıon», «Reketır» syndy fılmder dálel bola alady»,-dedi P. Novıkov.

Onyń pikirinshe, elimizde kınonyń qarqyndy da, jetistikti damýy úshin prodıýserleý jáne ınvestıtsııalaý ınstıtýtyn damytý qajet.

Oksana Melnıkovanyń aıtýynsha, qazir uıymdastyrý jumystary júrýde. «Festıval Kıno úıinde ótedi. Ádil qazylar quramy ázirge belgisiz. Festıvalge nıet bildirýshilerdiń barlyǵy qatysa alady»,-dedi ol.

Shara barysynda rejısser Petr Novıkovtyń «Skver» dep atalatyn psıhomıstıkalyq dramasynyń premeralyq kórsetilimi boldy.