Elimizde Memlekettik shekara ózgertilýi múmkin degen kez-kelgen oıdyń ózin bolǵyzbaýǵa tıispiz - M. Áshimbaev
ASTANA. 12 jeltoqsan. QazAqparat - Biz elimizde Memlekettik shekara ózgertilýi múmkin degen kez-kelgen oıdyń ózin bolǵyzbaýǵa tıispiz.
Búgin QR Parlamenti Májilisiniń jalpy otyrysynda «Qazaqstan Respýblıkasynyń Memlekettik shekarasy týraly» jańa zań jobasyn ekinshi oqylymda talqylaý barysynda depýtat Máýlen Áshimbaev osylaı málim etti.
Depýtattyń aıtýynsha, zań jobasynda shekara qaýipsizdigi, shekara saıasaty, memlekettik shekarany mejeleý jáne shegendeý sekildi uǵymdar naqtylanyp, halyqaralyq tásilderge sáıkestendirilgen. «Budan bólek, zań jobasynan memlekettik shekarany ózgertý múmkindigin kózdeıtin normalar alynyp tastaldy. Bul sheshim QR Konstıtýtsııasynyń 2-babyna negizdeldi. Onda «memleket óz aýmaǵynyń tutastyǵyn, qol suǵylmaýyn jáne bólinbeýin qamtamasyz etedi» delingen. Sondyqtan da, biz elimizde memlekettik shekara ózgertilýi múmkin degen kez-kelgen oıdyń ózin bolǵyzbaýǵa tıispiz», - dedi M. Áshimbaev.
Onyń aıtýynsha, Elbasy N. Nazarbaevtyń basshylyǵymen shekarany mejeleýdiń tarıhı úderisi aıaqtaldy. «Endi budan ári eshkimniń de shekarany ózgertý máselesin kóterýge negizi joq, sol úshin atalǵan norma zań jobasynan kórinis tapty», - deıdi depýtat.
