Elimizde memlekettik qyzmettiń 93,4% elektrondy formatqa aýystyryldy

NUR-SULTAN. QazAqparat – Qazaqstanda kórsetiletin memlekettik qyzmettiń 93,4 paıyzy elektrondy formatqa aýystyryldy. Bul týraly QR memlekettik qyzmet isteri agenttiginiń keńeıtilgen alqa otyrysynda aıtyldy, dep habarlaıdy QazAqparat tilshisi.

«Aldaǵy ýaqytta memlekettik qyzmetter sapasyn baǵalaýdy onlaın formatqa kezeń-kezeńmen kóshirý josparlanýda. Elektrondyq qyzmetterdi damytýǵa keler bolsaq, búginde memlekettik qyzmet kórsetý salasyn tsıfrlandyrýǵa erekshe kóńil bólinýde. Tizilimge sáıkes, memlekettik qyzmetterdiń 93,4% elektrondyq formatqa aýdaryldy», - dedi QR Memlekettik qyzmet isteri agenttiginiń tóraǵasy Darhan Jazyqbaev atalǵan jıynda.

Onyń aıtýynsha, atalǵan baǵyttaǵy oń ózgeristerge qaramastan, jekelegen memlekettik qyzmetter boıynsha problema bar.

«Agenttik turaqty negizde, «elektrondyq úkimet» portalynda memlekettik qyzmetterdiń kórsetilýine monıtorıng júrgizip, qorytyndysy boıynsha portalda elektrondyq qyzmetterdiń 189 túrine qoljetimdiliktiń joqtyǵyn anyqtady. Sonymen qatar, agenttiktiń jedel monıtorınginiń arqasynda, «elektrondyq úkimet» portalynda 158 elektrondyq qyzmettiń qoljetimdiligi qamtamasyz etildi», - deıdi ol.

Sonymen qatar agenttik basshysy memlekettik qyzmet salasy boıynsha álemdik úzdik tájirıbelerdiń zertteletindigin tilge tıek etti.

«Memlekettik qyzmetshilerdiń ózine júktelgen tapsyrmany utymdy oryndaýy úshin, ıkemdi jumys kestesi men qashyqtyqtan jumys isteý jaǵdaıyn jasaý qajet. ıAǵnı jumys jasaý keńistigindegi tıimdi jaǵdaılardy paıdalaný tájirıbesin keńeıtýimiz kerek. Sol sekildi aldaǵy ýaqytta agenttik sarapshylarmen ortaq talqylaýdyń qorytyndysyn jáne álemdik tájirıbeni jan-jaqty zerdelep, naqty usynystardy daıyndaıdy», - dedi D. Jazyqbaev.