Elimizde memlekettik aýdıttiń keshendi júıesi qurylatyn bolady - Májilis
ASTANA. QazAqparat - Búgin Parlament Májilisiniń jalpy otyrysynda palata depýtattary «Memlekettik aýdıt jáne qarjylyq baqylaý týraly» zań jobasyn ekinshi oqylymda maquldady. Qujat Elbasynyń «100 naqty qadam» Ult josparyndaǵy tapsyrmalaryn iske asyrýǵa baǵyttalady.
Zań jobasynyń basty maqsaty - qarjylyq baqylaýdyń quqyqtyq qoldaný tájirıbesin eskere otyryp, memlekettik aýdıttiń keshendi júıesin qurý. Jobany ázirleý barysynda Ekonomıkalyq yntymaqtastyq jáne damý uıymynyń múshe memleketteriniń tájirıbesi taldandy. Tutastaı alǵanda zań jobasy arqyly Qazaqstan halyqaralyq kásibı aýdıt standarttaryn engizetin bolady. Sonymen qatar, memlekettik aýdıt túrleri boıynsha tıimdilik aýdıtine, qarjylyq eseptilik aýdıtine jáne sáıkestik aýdıtine bólinedi. Onyń ishinde memlekettik aýdıttyń ózi syrtqy jáne ishki aýdıtke bólinedi. Tutastaı alǵanda, zań jobasyn qabyldaý memlekettik aýdıtorlarǵa qoıylatyn biliktilik talaptaryna, sondaı-aq olardyń táýelsizdigine kepildik beredi.
Májilis maquldaǵan zań jobasy Senatqa joldanady.
