Elimizde mektepterdi arnaıy kúzet qyzmeti táýlik boıy qadaǵalaıdy

NUR-SULTAN. QazAqparat – Qazaqstanda balalardyń qaýipsizdigin qamtamasyz etý maqsatynda mektepterdi táýlik boıy arnaıy kúzet qyzmetiniń qadaǵalaýyna berý máselesi qaralyp jatyr. Bul týraly QR Bilim jáne ǵylym mınıstrliginiń Balalar quqyqtaryn qorǵaý komıteti tóraǵasynyń orynbasary Dýlat Jekebaev málim etti, dep habarlaıdy QazAqparat tilshisi.

«Qazan, Permde bolǵan jaǵdaı bizge de kez kelgen qaýipke daıar bolýdyń qajettigin kórsetti. Balalar qaýipsizdigin qamtamasyz etýde mektep kúzetine qoıylatyn talap joǵary. Kúzet qyzmeti tótenshe jaǵdaıǵa árdaıym daıyn bolyp, shuǵyl sheshim qabyldaı bilýi tıis. Bul degenimiz beınebaqylaý kamerasynyń ornatylyp, onyń talap pen standartqa sáıkes jumys isteýi. Osy oraıda biz halyqaralyq tájirıbe men ózge elderde bolyp jatqan tótenshe jaǵdaılarǵa taldaý júrgizýdemiz», - dedi Dýlat Jekebaev «Kazakhstan Security Systems -2021» atty respýblıkalyq konferentsııa barysynda.

Onyń aıtýynsha, keıbir mektepterdegi beınebaqylaý kamerasy tıisti talap pen standartqa sáıkes kelmeıdi.

«Memleket basshysynyń tapsyrmasyna saı, bizdiń mınıstrlik quzyrly organdarmen birlesip mektep qaýipsizdigin táýlik boıy qadaǵalaıtyn arnaıy kúzet qyzmetimen qamtý máselesi qaralyp jatyr. Sonymen qatar, barlyq bilim berý mekemelerinde «dabyl batyrmasyn» ornatý da kún tártibinde. Atalǵan sharalar bıýdjetten qosymsha 2 mlrd teńge qarjyny talap etedi. Osy oraıda búginde quqyqtyq-normatıvtik aktige qaıta ózgerister engizilip jatyr», - deıdi ol.

Buǵan deıin habarlaǵanymyzdaı, elimizde kúzet qyzmetkerlerine qoıylatyn talap pen olardy daıarlaý jospary qaıta qaralyp jatyr.