Elimizde medıtsınalyq synaq ortalyǵy qurylady
Bul týraly Densaýlyq saqtaý mınıstri Alekseı Tsoı QR Prezıdenti janyndaǵy Adam quqyqtary jónindegi komıssııanyń otyrysynda aıtty.
«Medıtsınalyq kómekti qoljetimdi ári sapaly etý úshin densaýlyq saqtaý júıesiniń ınfraqurylymyn damytýǵa, maman daıarlaýǵa jáne halyqty dárilik zattarmen qamtamasyz etýge qarjy bólý boıynsha qosymsha sharalar qabyldandy. Aýyldarda medıtsınalyq kómektiń úlesi arttyrý úshin 137 tirek eldi mekende feldsherlik-akýsherlik medıtsınalyq pýnktter men dárigerlik ambýlatorııalar ashý kózdelgen», - dedi mınıstr.
Onyń aıtýynsha, ınvestıtsııalyq joba aıasynda elimizde 20 zamanaýı aýrýhana men 2 ǵylymı-ınnovatsııalyq ortalyq salynyp jatyr.
«Sonymen qatar, óńirlik medıtsınalyq uıymdardyń ınfraqurylymyn damytý úshin 85 mlrd teńgege kem degende 20 nysan salý jáne jańǵyrtý kózdelgen. Halyqty dárilik zattarmen jáne medıtsınalyq buıymdarmen qamtamasyz etý úshin aǵymdaǵy jyly 386,5 mlrd teńge kóleminde qarajat bólindi.
Prezıdent otandyq farmatsevtıkalyq ónim úlesin 17%-dan 50%-ǵa deıin jetkizýdi tapsyrdy. Sonyń aıasynda mınıstrlik jahandyq farmatsevtıkalyq korporatsııalarmen yntymaqtaty jandandyryp, ınvestor tartýda, tehnologııalar men jańa ázirlemelerdiń transfertin iske asyra bastadyq», - dedi Alekseı Tsoı.
Sondaı-aq, ol medıtsınalyq buıymdardy sanqta ótkizetin arnaıy ortalyq qurylatynyn atady.
«Halyqaralyq standarttar boıynsha akkredıttelgen medıtsınalyq buıymdarǵa zerthanalyq jáne tehnıkalyq synaqtar júrgizýge arnalǵan ortalyq qurý mindeti tur. Atalǵan is-sharaǵa 18,3 mlrd teńge somasynda qarjylandyrý qarastyrylǵan», - dedi Alekseı Tsoı.
