Elimizde medıtsınalyq qaldyqtardy óńdeý qalaı iske asyrylady

NUR-SULTAN. QazAqparat –Senattyń jalpy otyrysynda Ekologııa, geologııa jáne tabıǵı resýrstar mınıstri Maǵzum Myrzaǵalıev qaldyqtardy qaıta óńdeý salasyndaǵy jospardy aıtty, dep habarlaıdy QazAqparat tilshisi.

«Memleket basshysy jaqynda tıisti zańǵa qol qoıǵan bolatyn. Bizdiń josparymyz boıynsha kelesi jylda aýktsıon ótkizetin bolamyz. Osy oraıda alty pılottyq qalany iriktedik, onyń ishinde Almaty, Nur-Sultan, Shymkent, Taraz, Aqtóbe, Atyraý qalalary bar. Qazirgi kezde úlken problemany biri – ol qoqysty qaıta óńdeýdiń tómen deńgeıi. Jyl saıyn 5 mln tonna qaldyq jınalsa, sonyń 15 paıyzy ǵana qaıta óńdeledi. Atalǵan 6 qanatqaqty joba iske asyrylǵannan keıin, qaıta óńdeýdiń deńgeıi 30 paıyzǵa jetkizilmek», - dedi mınıstr.

Sonymen qatar Myrzaǵalıev medıtsınalyq qoqystar máselesine toqtaldy.

«Bul taqyryp bıyl asa ózekti boldy. Jańa Ekologııalyq kodekstiń normalaryna sáıkes, bul úderis Densaýlyq saqtaý mınıstrligine quzyretine jatady. Degenmen, qoqys óńdelmegen jaǵdaıda Ákimshilik kodekstiń normalaryna sáıkes, ákimshilik aıyppul 10 ese ósedi. Ekinshiden, osy qaldyqtar qalyptasatyn emhanalar men klınıkalar qaldyqtarǵa jaýapty bolady. Al sol qaldyqtardy qaıta óńdeıtin mekemeler lıtsenzııalaý protsesinen ótýi kerek. Sondyqtan bul protsess kúsheıtiledi», - dedi mınıstr.