Elimizde medıtsınalyq bilimi joq adamdarǵa arnalǵan alǵashqy kómektiń standarty bekitildi
Osyndaı buıryqqa QR Densaýlyq saqtaý mınıstri 2019 jyldyń 26 tamyzynda qol qoıdy jáne ol alǵash resmı jarııalanǵannan keıin kúntizbelik on kún ótken soń kúshine enedi.
«Qıyn jaǵdaıǵa tap bolǵan adamǵa alǵashqy kómek ýaqytyly jáne durys kórsetilse, naýqasty jaraqattan aman saqtap, tipti ómirin qutqaryp qalýǵa bolady. Sondyqtan, dárigerler ǵana emes, medıtsınalyq bilimi joq azamattardyń da alǵashqy kómek kórsetý daǵdysyn ıgerýi mańyzdy.
Osyǵan baılanysty halyqty shuǵyl jaǵdaıda alǵashqy kómek kórsetýge daıyndaý úshin «QR-da Alǵashqy kómekti uıymdastyrý standartyn bekitý týraly» QR Densaýlyq saqtaý mınıstriniń 2019 jylǵy 26 tamyzdaǵy № 114 buıryǵy (budan ári - Standart) bekitildi», delingen habarlamada.
Alǵashqy medıtsınalyq kómek - shuǵyl jaǵdaıda adam ómirin qutqaryp qalýǵa jáne asqynýdyń aldyn alý maqsatynda oqys oqıǵa bolǵan jerde kórsetiletin jedel is-sharalar kesheni. Arnaıy bilimi bar kez kelgen adam alǵashqy kómek kórsete alady. Alaıda aǵashqy kómek durys kórsetilmese, naýqasqa zııan keltirýi múmkin.
Bekitilgen standart medıtsınalyq bilimi joq adamdarǵa alǵashqy kómektiń tártibi men bazalyq is-sharalaryn reglamentteıdi. Alǵashqy kómekti zardap shegýshiniń ózi de, jaqyn jerdegi basqa adam da kórsete alady. Standart ómirge qaýip tóndiretin jáne jıi kezdesetin jazataıym jaǵdaıda alǵashqy kómek kórsetý algorıtmderin qamtıdy. Standart úzdik tájirıbege negizdelgen jáne halyqaralyq oqytý baǵdarlamalaryna sáıkes ázirlengen.
«Tájirıbe kórsetip otyrǵandaı, daıyndyqtan ótken adam oqys oqıǵa kezinde saýatty áreket etedi, shuǵyl jedel járdem qyzmetin shaqyryp, olarǵa bolǵan oqıǵa týraly tolyq aqparat beredi. Jáne zardap shekkenderge qajetti alǵashqy kómek kórsete otyryp ólim-jitimniń aldyn alýǵa qabiletti bolady. Dúnıejúzilik densaýlyq saqtaý uıymynyń (DDSU) málimeti boıynsha, álemde jyl saıyn jalpy ólimniń 10%, jol-kólik oqıǵasy, kúıip qalǵannan, qulap nemese sýǵa batyp qaıtys bolady jáne múgedektiktiń 15% dál osyndaı oqys jaǵdaıdan bolady», delingen habarlamada.
Halyqty alǵashqy kómek kórsetý daǵdylaryna úıretý úshin jattyqtyrýshylardy daıyndaý isimen QR Densaýlyq saqtaý mınıstrliginiń «Ulttyq shuǵyl medıtsınany úılestirý ortalyǵy» ShJQ RMK aınalysady. Bul kýrstan kez kelgen kásiporyn men memlekettik mekemeler jáne jeke qurylymdar óte alady.
