Elimizde medıtsına mamandarynyń bilimi táýelsiz komıssııa arqyly baǵalanady
Qazirgi kezde joǵary bilimdi densaýlyq saqtaý kadrlaryn daıarlaýdy 5 memlekettik medıtsınalyq JOO, 3 memlekettik emes JOO jáne kópbeıindi ýnıversıtetter quramyndaǵy 6 fakýltet júzege asyryp otyr.
«2018-2019 oqý jylynda medıtsınalyq JOO-ǵa 6380 adam qabyldandy. Onyń ishinde respýblıkalyq bıýdjet sheńberinde - 2661 adam, jergilikti bıýdjet sheńberinde - 459 adam, aqyly negizde - 3260 adam», - dep málimdedi mınıstr.
«Kadr daıarlaý sapasyn arttyrý maqsatynda 2016 jyly medıtsınalyq jáne farmatsevtıkalyq bilim berý jáne adamı resýrstardy basqarý júıesin jańǵyrtý boıynsha joba bastaldy. Osy jobanyń sheńberinde «Nazarbaev ýnıversıteti» modeli úlgisinde álemdegi úzdik 500 oqý ornynyń qataryna kiretin sheteldik ýnıversıtetter tartyldy, bul - AQSh, Shvetsııa, Italııa, Túrkııa, Lıtva men Polshanyń medıtsınalyq mektepteri» - dep jalǵastyrdy ol.
Budan basqa, mınıstr strategııalyq áriptestikti iske asyrý sheńberinde Shvetsııa, Frantsııa, Polsha, Chehııa, Italııa, Úndistan jáne Túrkııadan basqarýshy pozıtsııalarǵa jáne kafedra professorlary retinde 9 sheteldik mamannyń tartylǵanyn atap ótti.
Sonymen qatar, 2018 jyldan bastap stýdentter men bitirýshi mamandardyń bilimin aralyq táýelsiz baǵalaý júıesi engizildi. Ol boıynsha táýelsiz komıssııa arqyly mamannyń medıtsınalyq kásibı jáne praktıkalyq bilimi tekserilip, sonyń negizinde arnaıy lıtsenzııa beriledi.
Sondaı-aq, kadr tapshylyǵyn azaıtý maqsatynda memlekettik uıymdarda úsh jyl jumyspen óteý talaby engizildi (2016 jyldan bastap - rezıdentýrany bitirýshiler úshin, 2019 jyldan bastap - ınternatýrany bitirýshiler úshin). Mınıstrdiń aıtýynsha, óńirlerde tapshy mamandyqtar, atap aıtqanda nevrologııa, kásibı patologııa, ftızıatrııa, medıtsınalyq reabılıtologııa, klınıkalyq farmakologııa, anestezıologııa jáne reanımatologııa, klınıkalyq zerthanalyq dıagnostıka boıynsha qaıta daıarlaýdan keıin aýdan jáne aýyldyq densaýlyq saqtaý mekemelerine jiberiledi.