Elimizde medıtsına qyzmetkerleri kúnine oraı respýblıkalyq spartakıada bastaldy
Atalǵan spartakıada jyl saıyn Medıtsına qyzmetkerleriniń kúni (maýsym aıynyń úshinshi jeksenbisi) jáne Ulttyq oıyndar kúni aıasynda ótkiziledi.
Medıtsınalyq qyzmetkerler shaǵyn fýtbol, voleıbol, jeńil atletıkadan estafeta, jeńil atletıka, ústel tennısi, armreslıng, sondaı-aq arqan tartý, asyq, qazaqsha kúres, qyz qýý, kókpar jáne toǵyzqumalaq sııaqty ulttyq oıyndarda kúsh synasady. Dene belsendiligi júrek-qan tamyrlary aýrýlary, gıpertenzııa, dıabet jáne obyrdyń keıbir túrleri boıynsha qaterlerdi tómendetýge yqpal etedi. Ol adamnyń psıhıkalyq densaýlyǵyna oń áser etip, kúızelis, tynyshsyzdyq jáne jabyǵýshylyq jaǵdaılaryn tómendetedi. Dúnıejúzilik densaýlyq saqtaý uıymy (DDU) eresek adamdarǵa apta boıyna kem degende 150 mınýt dene belsendiligimen aınalysýǵa keńes beredi. Búgingi tańda álemde dene belsendiligi deńgeıiniń tómendeý úrdisi baıqalady. Málimetter boıynsha, Eýropada eresek adamdardyń shamamen 35% belsendi ómir saltyn jetkilikti deńgeıde ustanbaıdy. Eýropa Odaǵyna qatysty sońǵy derekterge qaraǵanda, árbir 10 adamnyń 6-ýy eshqashan sportpen nemese dene shynyqtyrýmen aınalyspaǵan nemese óte sırek aınalysady. 52%-y dene belsendiliginiń ózge de túrlerimen aınalyspaıdy nemese oǵan sırek kóńil bóledi. Al Eýropadaǵy eresek adamdardyń 64%-y kúnine keminde 4 saǵat otyryp jumys isteıdi. Bul - DDU barlyq óńirleri ishinde eń joǵary kórsetkish. DDU sarapshylarynyń pikirinshe, kásiporyndar men uıymdarda dene belsendiligin arttyrýǵa kóńil bólip, qyzmetkerlerdi dene shynyqtyrýmen aınalysýǵa yntalandyrý kerek. Osyǵan baılanysty, dástúrli spartakıada ótkizý medıtsınalyq qyzmetkerler arasynda dene belsendiligin jáne sportty nasıhattaýǵa, medıtsınalyq qoǵamdastyqty dene shynyqtyrýmen aınalysýǵa jumyldyrýǵa, densaýlyqqa ortaq jaýapkershilikti qalyptastyrýǵa jáne turǵyndar arasynda salaýatty ómir saltyn nasıhattaýǵa múmkindik beredi. Spartakıada qorytyndysy respýblıka óńirlerinde 20 maýsymda - medıtsına qyzmetkerleriniń kúnine oraı shyǵarylady.