Elimizde Máýlit merekesi atap ótilýde
LMATY. Naýryzdyń 13-i. QazAqparat /Ádilet Musahaev/ - Búgin Almaty qalasyndaǵy Respýblıka Saraıynda paıǵambarymyz Muhammed s.ǵ.s. týylǵan kúni Máýlit meıramyna arnalǵan merekelik shara ótýde,
dep habarlaıdy QazAqparat.
Sharany Qazaqstan Musylmandar dinı basqarmasynyń Bas múftıi Ábsattar Derbisáli óziniń quttyqtaý sózimen ashty. Ol Máýlit merekesiniń tarıhyna toqtala kele, bul meıramnyń elimizde erterekte de toılanǵanyn atap ótti. Sondaı-aq ol paıǵambarymyzdyń ómirinen, qaldyrǵan ósıetterinen mysaldar keltire otyryp, halyqty ımandylyqqa, izgilikke shaqyratyn lebizin bildirdi. «Máýlittiń toılanyp kele jatqanyna myń jyldan asty. Bul dástúr qazaq elinde burynnan bar, keńinen taraǵan edi, biraq belgili sebepterge baılanysty úzilister boldy. Máýlit jyry meshitterden bastalady, elimizdiń barlyq meshitterinde osy meıram atap ótilip kele jatyr. Basqa musylman elderinde bul mereke 1 aı boıy toılanady», deıdi Bas múftı.
Sondaı-aq merekelik sharaǵa Almaty qalasy Medeý aýdanynyń ákimi Mahambet Baıdáli kelip, jınalǵan qaýymdy búgingi Máýlit merekesimen quttyqtap, óziniń tilegin jetkizdi. «Qazir Islam elderiniń barlyǵynda Máýlit merekesi atap ótilýde, bul paıǵambarymyzǵa degen súıispenshilik, qurmetimiz», - deıdi aýdan ákimi.
Merekelik shara barysynda dinı madaq jyrlary men ánder oryndalyp, teatrlandyrylǵan qoıylymdar kórsetildi.
