Elimizde máslıhat depýtattaryn saılaýdyń proportsıonaldyq júıesi engizilmek
ASTANA. QazAqparat - Búgin Parlament Májilisinde ótken dóńgelek ústel otyrysynda Saılaý týraly zań jobasy talqylandy, dep habarlaıdy QazAqparat tilshisi.
Naqtyraq aıtqanda, jıynda «Qazaqstan Respýblıkasyndaǵy saılaý týraly» Konstıtýtsııalyq zańyna ózgerister men tolyqtyrýlar engizý týraly» Konstıtýtsııalyq zań jobasy jáne «Qazaqstan Respýblıkasynyń keıbir zańnamalyq aktilerine saılaý máseleleri boıynsha ózgerister men tolyqtyrýlar engizý týraly» Zań jobasy qaraldy.
Otyrys barysynda QR Ádilet vıtse-mınıstri Natalıa Pan zań jobasyn tanystyrdy.
«Saılaý týraly Konstıtýtsııalyq zańǵa kontseptýaldy ózgerister 2009 jyly engizilgen bolatyn. Ádilet mınıstrligi bıyl saılaý týraly jańa zań jobasyn ázirledi. Ol jańa ınstıtýttardyń engizý arqyly saılaý zańnamasyn jetildirýge baǵyttalǵan. Zań jobasyn ázirleýdiń maqsaty - saılaý qaǵıdattaryn saqtaý, azamattardyń saılaýshy retinde quqyǵyn qorǵaý jáne saılana bilý bolyp otyr», - dedi Natalıa Pan.
Vıtse-mınıstrdiń aıtýynsha, osy zań jobasynyń jańalyqtary: máslıhat depýtattaryn saılaýdyń proportsıonaldyq júıesin engizý, aýdandyq mańyzy bar qala, aýyl, kent, aýyldyq okrýg ákimin tikeleı saılaýdy engizý, okrýgtik saılaý komıssııalaryn taratý, kásiptik turaqty negizdegi ókilettikterdi aýmaqtyq saılaý komıssııalarynyń eki múshesiniń júzege asyrý, saılaýshylardyń tizimderin tsıfrlandyrý bolyp otyr.
Zań jobalarymen azamattardyń saılaý quqyqtaryn, onyń ishinde olardyń jekelegen sanattaryna (múgedekter, áskerı qyzmetshiler, bilim alýshylar) qatysty neǵurlym tolyq iske asyrý úshin quqyqtyq, uıymdastyrýshylyq, materıaldyq-tehnıkalyq jaǵdaılar jasaýǵa baǵyttalǵan normalar engiziledi. Oqytýǵa jergilikti bıýdjet qarajatyn jumsaý múmkindigin anyqtaý úshin Qazaqstan Respýblıkasynyń Bıýdjet kodeksine tolyqtyrý engiziledi.
Aıta keteıik, atalǵan jıynǵa Ortalyq saılaý komıssııasynyń, Joǵarǵy Sottyń, Bas prokýratýranyń, Ádilet mınıstrliginiń, basqa da múddeli mınıstrlikter men vedomstvolardyń ókilderi, sondaı-aq saıası partııalardyń jáne halyqaralyq uıymdardyń ókilderi qatysty.
