Elimizde mamandandyrylǵan aýdanaralyq ákimshilik sottar ashylady

NUR-SULTAN. QazAqparat – 2021 jylǵy 1 shildeden bastap kúshine enetin Ákimshilik rásimdik-protsestik kodekstiń aıasynda elimizde 21 ákimshilik sot qurylady. Bul týraly QR Joǵarǵy Sotynyń baspasóz hatshysy Aıdos Sadýaqasov málim etti, dep habarlaıdy QazAqparat tilshisi.

«Bıylǵy 1 shildege deıin elimizde 21 ákimshilik sot (mamandandyrylǵan aýdanaralyq ákimshilik sottar) qurylady. Ol sottardyń 17-si elimizdiń iri qalalarynda, ıaǵnı oblys ortalyqtarynda qurylsa, qalǵan tórteýi turǵyndar kóp shoǵyrlanǵan Qaskeleń, Semeı, Jazqazǵan jáne Ekibastuz sııaqty iri qalalarda ornalasatyn bolady», - dedi A. Sadýaqasov Ortalyq kommýnıkatsııalar qyzmetinde.

Onyń aıtýynsha, ákimshilik ádilet júıesine daıyndyq júrgizilip jatyr. Qazirgi kezde sýdıalardy oqytý is-sharalary uıymdastyrylǵan.

«Osy oqytý júıesimen 500-ge tarta sýdıa qamtyldy. Sonymen qatar zańnyń normalaryn túsindirip jatyrmyz. Endi azamattardyń memlekettik organmen nemese laýazymdy tulǵamen daý týyndaǵan kezde osyndaı ákimshilik sottarǵa júginetin bolady. Jalpy, elimizde qazirgi kezde qylmystyq, azamattyq, ákimshilik quqyq buzýshylyq týraly ister qaralatyn bolsa, bul tórtinshi jańa sot isin júrgizetin ınstıtýt. Bul ınstıtýtqa sáıkes, ákimshilik is júrgizý degen uǵym engiziledi», - dedi Aıdos Sadýaqasov.

Budan buryn habarlanǵandaı, 2021 jylǵy 1 shildeden bastap Qazaqstanda Ákimshilik rásimdik-protsestik kodeks kúshine enedi.

Bul zań jeke adam men zańdy tulǵanyń memlekettik organǵa nemese laýazymdy tulǵalarǵa qarsy óziniń quqyǵyn durys qoldanýyna zor múmkindikter jasaıdy.