Elimizde mal urlyǵy úshin arnaıy bap paıda bolady
NUR-SULTAN. QazAqparat - Qylmystyq zańnamada mal urlyǵy úshin jaýapkershilik júkteıtin jeke bap paıda bolady. Zańnamadaǵy tyń ózgeris jaıly halyqqa esep berý kezdesýinde Іshki ister mınıstri Erlan Turǵymbaev aıtty, dep habarlaıdy QazAqparat tilshisi.
«Mal urlyǵy úshin jaýapkershilikti kúsheıtý tetikteri qarastyrylyp jatyr. Sebebi, atalmysh qylmys aýyl halqy úshin aıtarlyqtaı shyǵyn keltirip jatqany ótirik emes», - dedi mınıstr.
Erlan Turǵymbaevtyń aıtýyna qaraǵanda, qazirgi tańda óńirlerdiń ákimdikterimen maldy arnaıy kezekpen jaıý, statsıonarlyq veterınarlyq beket qurý jumystary júrgizilip jatyr.
«Qylmystyq zańnamada mal urlyǵy úshin jaýapkershilikti júkteıtin jeke bap («Mal urlyǵy 188-1 baby) paıda bolady. Sonymen qatar, «aýlaǵa nemese qoraǵa kirý jolymen» jasalǵan mal urlyǵy aýyr qylmystardyń sanatyna engiziledi», - dedi mınıstr.
