Elimizde lotereıalar týraly zań joq, al onyń ózi qarqyndy damyp keledi - R.Shaekın

Depýtat Raýan Shaekınniń aıtýynsha, zań jobasy osymen birneshe márte Májiliske «bas suǵyp, qaıta shyǵyp júr». Sonyń saldarynan segiz jyl boıy otyzǵa tarta baptan turatyn qujat qabyldanbaı keledi. «Bizge birqatar ózekti problemalardy sheship beretin lotereıalar týraly zań kerek. Atap aıtqanda, atalǵan zań tólenetin salyqtardy naqty aıqyndaýy kerek. Lotereıaǵa qyzyǵatyn azamattardyń ashýyn týdyrmaıtyndaı oıyn utystarynyń naqty tólenýin qamtamasyz etýi kerek. Al oıynnan túsetin qarajat áleýmettik problemalardy sheshýge, sport pen dene shynyqtyrýdy qoldaýǵa jumsalýy kerek, bul negizgi pozıtsııa», - deıdi R.Shaekın. Onyń sózine qaraǵanda, zań jobasynyń bastamashylary «qyzmettiń bárin bir qaqpaǵa baǵyttaýdy» qalap otyr. ıAǵnı, basynda bir ǵana organ turyp, qarajatty da ózderi basqarǵysy keledi. «Biz buǵan kelispeımiz. Qarańyzdar, buǵan deıin elimizde eshqandaı zań qabyldanǵan joq, alaıda lotereıalyq qyzmet Qazaqstanda gúldenip keledi. Máselen, 2007 jyly biz bul qujatpen tanysa bastaǵan kezde «lotereıa termınaly» degen uǵym da bolǵan joq, qazir bul bar. Al biz bolsaq bul qujatty Parlamenttiń sýyrmasynan ári shyǵarmaı, jumysty áli de jalǵastyryp kelemiz. Al nege qabyldanbaı jatyr degenge jaýap daıyn: «zań jobasy Parlamentte, olar áli qabyldamaı jatyr» deıdi. Endeshe, «dop bizdiń alańda» bolǵandyqtan, buǵan biz kináli sekildi kórinemiz. Másele usynylǵan zań jobasynyń sapasynda bolyp tur ǵoı», - dedi depýtat. Onyń aıtýynsha, lotereıalyq qyzmettiń zańmen rettelmeýi elimizdiń krımınogendik jaǵdaıyna da jaǵymsyz áser etip jatyr.