Elimizde lıtsenzııaly kúzetpen qamtylǵan bilim berý uıymdarynyń sany 7 esege artty

ASTANA. QazAqparat – Úsh jylda dabyl túımesi qoıylǵan bilim berý uıymdarynyń sany 21 esege artty. Bul týraly Oqý-aǵartý vıtse-mınıstri Edil Ospan aıtty, dep habarlaıdy QazAqparat tilshisi.

«Toqsan saıyn mınıstrlik bilim uıymdarynda qaýipsizdik talaptarynyń saqtalýyna monıtorıng júrgizip keledi. Onyń qorytyndylary júıeli túrde Úkimet deńgeıinde talqylanady. Bilim berý uıymdarynda qaýipsizdik júıelerin qamtamasyz etýde jalpy oń qarqyn bar ekenin aıtqan jón. Máselen, 2020 jylmen salystyrǵanda jedel basqarý ortalyqtaryna qosylǵan bilim berý uıymdarynyń sany 11 esege (2020 j. – 500, 2023 j. –5 588), lıtsenzııalanǵan kúzetpen qamtylǵan bilim berý uıymdarynyń sany 7 esege (2020 j. - 275, 2023 j. –1 947), dabyl túımesi qoıylǵan nysandar sany 21 esege (2020 j. - 115, 2023 j. – 2 404), týrnıketteri bar bilim berý uıymdarynyń sany 6 esege artty (2020 j. - 271, 2023 j. – 1 584)», - dedi E. Ospan Májiliste mektepke deıingi jáne orta bilim berý uıymdaryndaǵy qaýipsizdik júıeleri taqyrybyna arnalǵan dóńgelek ústel otyrysynda.

Onyń aıtýynsha, bıylǵy 1-toqsanda bilim berý nysandaryn keshendi qaýipsizdik júıesimen qamtamasyz etýdiń jaı-kúıin zerdeleý boıynsha monıtorıng júrgizildi.

«Respýblıka boıynsha 162 monıtorıngtik top jumys istedi. Monıtorıngtik toptardyń quramyna jergilikti atqarýshy organdardyń, bilim salasynda sapany qamtamasyz etý, polıtsııa, tótenshe jaǵdaılar jónindegi departamentterdiń jáne úkimettik emes uıymdardyń ókilderi kirdi. Monıtorıng barysynda 10 myńnan asa bilim berý nysany tekserildi (10 061 bilim berý uıymy: 2 654 balabaqsha, 6 935 mektep jáne 472 kolledj)», - dedi vıtse-mınıstr.