Elimizde qyzylshamen aýyrǵan balalardyń 80 paıyzy ekpe almaǵan - Abaev

ASTANA. QazAqparat - QR Aqparat jáne kommýnıkatsııalar mınıstri Dáýren Abaev elimizde qyzylsha aýrýyn juqtyrǵandardyń kóbeıýine qatysty pikir bildirdi, dep habarlaıdy QazAqparat.

«Jalpy qyzylshanyń taraý jaǵdaıy álemniń túkpir-túkpirinde tirkelip jatyr. Bir jyldary bul aýrýǵa shaldyqqandar kóp bolsa, ekinshi jyly az bolýy yqtımal. Biraq, oǵan bir degende júzdegen adam shaldyǵyp jatady. Máselen, 2005 jyly Qazaqstanda qyzylshamen 16 myń adam aýyrǵan. Biraq, ol kezde de, bul kúnde de epıdemııa týraly áńgime bolǵan emes. Epıdemııa degen - belgili bir aýrýmen halyqtyń kem degende 5 paıyzy shaldyqqan kezde aıtylady», - dedi Dáýren Abaev Habar arnasyndaǵy «Ashyq dıalog» baǵdarlamasynda bergen suhbatynda.

Mınıstrdiń aıtýyna qaraǵanda, Densaýlyq saqtaý mınıstrligi bul aýrý boıynsha turaqty túrde monıtorıng júrgizip, qyzylsha tarap ketpeýi úshin aldyn alý sharalaryn júrgizýde.

«2018 jyly - qyzylshaǵa shaldyǵý jaǵynan kóptegen álem elderine rekordty jyl bolyp otyr. Máselen, qyzylshaǵa shaqqandardyń sany Serbııada 5 myńǵa jetse, Frantsııa men Danııada 3 myńǵa jetip jyǵylǵan. Qazaqstanda qyzylshaǵa shaldyqqandardyń 85 paıyzy 14 jasqa deıingi balalar. Ókinishke qaraı, qyzylshamen aýyrǵan balalardyń 80 paıyzy qyzylshaǵa qarsy ekpe almaǵan», - deıdi ol.

Dáýren Abaev sonymen birge vaktsııanatsııadan bas tartqandarǵa qatysty da oıyn bildirdi.

«Japonııada 1947-1974 jyldar aralyǵynda kókjótelge qarsy vaktsınatsııanyń arqasynda aýyrǵandardyń sany 100 myńnan 200 adamǵa deıin azaıǵan. Alaıda 1975 jyly vaktsınatsııadan keıin eki bala qaıtys bolǵan. Bul jaǵdaı el ishinde birshama rezonas týdyryp, BAQ birden bul máselege erekshe mán beredi. Osynyń artynsha ata-analar jappaı balalaryna ekpe jasatýdan bas tarta bastaıdy. Aqyry, 1981 jylǵa qaraı kókjótelge shaldyqqandardyń sany 13 myńǵa jetip, ólim-jitim jaǵdaıy 100 esege deıin kóbeıip ketken. Memleket aqyry ekpeni qaıta qaıtaryp, balalar bul aýrýǵa sırek shaldyǵatyn bolǵan. Jalpy, biz qazir paradoksaldy jaǵdaımen betpe-bet kelip otyrmyz. Qazir barlyq vaktsınadan ótip, óz ómirin qaýipte qaldyrmaǵan býyn vaktsııanatsııadan bas tartyp jatyr», - dep túıdi Dáýren Abaev.

Eske sala ketsek, budan birneshe kún buryn ótken baspasóz máslıhatynda Qazaqstannyń bas memlekettik sanıtar dárigeri Jandarbek Bekshın Qazaqstanda qyzylshanyń órship turmaǵanyn aıtqan bolatyn.