Elimizde qylmystyq protsestiń úsh býyndy modeli engiziledi
Bıyl, 1 qyrkúıekte Memleket basshysy Qasym-Jomart Toqaev «Jańa jaǵdaıdaǵy Qazaqstan: is-qımyl kezeńi» atty Qazaqstan halqyna joldaýynda zańnamanyń jekelegen aspektilerin jetildirýge baǵyttalǵan birqatar tapsyrma bergen edi. Al 20 jeltoqsanda «Qazaqstan Respýblıkasynyń keıbir zańnamalyq aktilerine qylmystyq protseste azamattardyń quqyqtaryn qorǵaýdy kúsheıtý jáne sybaılas jemqorlyqqa qarsy is-qımyl máseleleri boıynsha ózgerister men tolyqtyrýlar engizý týraly» Zańnyń qabyldanýy atalǵan tapsyrmalardy iske asyrýdyń nátıjesi sanalady.
QR Іshki ister mınıstrliginiń málimetinshe, kelesi jyldyń basynda kúshine enetin Zań memlekettik qyzmetshiler, depýtattar, sýdıalar úshin sheteldik bankilerde shottardy ıelenýge, onda qolma-qol aqshalaı qarajatty jáne baǵaly zattardy saqtaýǵa shekteý engizedi. Quqyq qorǵaý organdary qyzmetkerleriniń, sýdıalardyń, para berýshilerdiń jáne para berýde deldal bolǵandardyń sybaılas jemqorlyq úshin jaýapkershiligin qatańdatady. Al memlekettik qyzmetshilerde nemese kvazımemlekettik uıymdardyń basshylarynda qos azamattyqtyń bolýy olardy atqaryp otyrǵan laýazymnan bosatý úshin negizge aınalady.
«2021 jylǵy 1 qańtardan bastap qylmystyq protsestiń úsh býyndy modeli engiziledi. Ókilettikterdiń naqty ajyratylýy onyń erejeleriniń biri bolyp sanalady. Endi prokýror qylmystyq protseske qatysýshylardyń konstıtýtsııalyq quqyqtaryn qozǵaıtyn negizgi protsestik sheshimderdi kelisetin bolady. Memleket basshysynyń qoly qoıylatyn «Qazaqstan Respýblıkasynyń keıbir zańnamalyq aktilerine Prezıdenttiń «Jańa jaǵdaıdaǵy Qazaqstan: is-qımyl kezeńi» atty 2020 jylǵy 1 qyrkúıektegi Joldaýynyń jekelegen erejelerin iske asyrý máselesi boıynsha ózgerister men tolyqtyrýlar engizý týraly» Zań jobasy ulttyq zańnamaǵa engiziletin ózgeristerdiń taǵy bir keshenin qamtıdy«, - dep atap ótedi mınıstrlikten.
Atalǵan zań jobasy aıasynda kámeletke tolmaǵandarǵa qarsy jasalatyn jynystyq qylmystarǵa jaýapkershilik qatańdatylady. Sondaı-aq bul sanatqa jatatyn qylmystardyń sany kóbeıtiledi. «Pedofılderdi» barynsha qaýipsiz mekemelerde ustaý kózdeledi. Olardy merzimnen buryn bosatý múmkindigi joıylady.
Atalǵan Zań jobasynyń qabyldanýy sondaı-aq «Bas bostandyǵynan aıyrý oryndarynan bosatylǵan adamdardy ákimshilik qadaǵalaý týraly» Zańyna ózgerister engizedi. Osylaısha kámeletke tolmaǵandarǵa qarsy jynystyq qylmystyq boıynsha jazasyn ótegen adamdardy ákimshilik qadaǵalaý merzimi sottylyqty óteý merzimine deıin arttyrylatyn bolady.