Elimizde qylmystyq protsestiń úsh býyndy modeli engizildi
NUR-SULTAN. QazAqparat – 2021 jyldyń 1 qańtarynan elimizde qylmystyq protsestiń úsh býyndy modeli engiziledi, dep habarlaıdy QazAqparat tilshisi.
Búginnen bastap kúshine engen Zań memlekettik qyzmetshiler, depýtattar, sýdıalar úshin sheteldik bankilerde shottardy ıelenýge, onda qolma-qol aqshalaı qarajatty jáne baǵaly zattardy saqtaýǵa shekteýdi kózdeıdi. Quqyq qorǵaý organdary qyzmetkerleriniń, sýdıalardyń, para berýshilerdiń jáne para berýde deldal bolǵandardyń sybaılas jemqorlyq úshin jaýapkershiligin qatańdatty. Al memlekettik qyzmetshilerde nemese kvazımemlekettik uıymdardyń basshylarynda qos azamattyqtyń bolýy olardy atqaryp otyrǵan laýazymnan bosatý úshin negizge aınaldy.
Sonymen qatar kámeletke tolmaǵandarǵa qarsy jasalatyn jynystyq qylmystarǵa jaýapkershilik qatańdatyldy. Sondaı-aq bul sanatqa jatatyn qylmystardyń sany kóbeıtildi. Pedofılderdi barynsha qaýipsiz mekemelerde ustaý kózdeldi. Olardy merzimnen buryn bosatý múmkindigi joıyldy.
Atalǵan Zańnyń qabyldanýy sondaı-aq «Bas bostandyǵynan aıyrý oryndarynan bosatylǵan adamdardy ákimshilik qadaǵalaý týraly» Zańyna ózgerister engizdi. Osylaısha kámeletke tolmaǵandarǵa qarsy jynystyq qylmystyq boıynsha jazasyn ótegen adamdardy ákimshilik qadaǵalaý merzimi sottylyqty óteý merzimine deıin arttyryldy.
