Elimizde qylmys órship turǵan óńirler belgili boldy
NUR-SULTAN. QazAqparat - 2020 jyldyń III toqsanynda elimizde 126 myńnan astam qylmystyq quqyq buzýshylyq tirkeldi. Bul týraly QR UEM Statıstıka komıtetinen málim etti, dep habarlaıdy QazAqparat tilshisi.
QR Bas prokýratýrasy Quqyqtyq statıstıka jáne arnaıy esep komıtetiniń derekteri boıynsha 2020 jylǵy III toqsanda 126 499 qylmystyq quqyq buzýshylyq tirkeldi. Bul ótken jylǵy sáıkes kezeńmen salystyrǵanda 34,4 paıyzǵa kem.
Respýblıkadaǵy qylmys deńgeıi 10 myń turǵynǵa shaqqanda 90 tirkelgen qylmysty qurady. Oblystar men respýblıkalyq mańyzy bar qalalar bólinisinde 10 myń turǵynǵa shaqqandaǵy eń joǵary qylmys deńgeıi Almaty, Shymkent, Nur-Sultan qalalarynda, Qostanaı, Aqmola, Shyǵys Qazaqstan jáne Batys Qazaqstan oblystarynda, eń tómeni Túrkistan oblysynda baıqalady.
Aýyr jáne asa aýyr qylmystar sany ótken jylǵy sáıkes kezeńmen salystyrǵanda 65,2 paıyzǵa artty. Qylmystar qurylymynda olardyń úles salmaǵy 31,5 paıyz (2019 jylǵy III toqsanda – 12,1%) tıisinshe, aýyrlyǵy ortasha jáne tómen qylmystar 50,9 (72,7%) jáne 17,6 paıyzdy (15,2%) qurady.
«2020 jylǵy III toqsan nátıjeleri boıynsha tirkelgen qylmystardyń ishindegi eń úlken úlesti menshikke qarsy qylmystar alady - 73,6 paıyz (2019 jylǵy III toqsanda – 79,2%). Olardyń kópshiligi basqa bireýdiń múlkin urlaý – 52,8 myń oqıǵa (109 myń oqıǵa.). Qylmystyń osy tobynda ótken jylǵy sáıkes kezeńmen salystyrǵanda kórineý qylmystyq jolmen tabylǵan múlikti ıemdený nemese ótkizýge baılanysty jaǵdaılar 74,2 paıyzǵa artqanyn atap ótý kerek», - dedi komıtetten.
Vedomstvo málimetinshe, jeke adamǵa qarsy jasalǵan qylmystar sany 7 052 oqıǵany qurady. Bul ótken jylǵy sáıkes kezeńmen salystyrǵanda 11,7 paıyzǵa az. Zorlaý – 39,6, qorqytý – 26,4, adam urlaý – 24 paıyz tómendegen.
Sonymen qatar, qasaqana kisi óltirý jáne adam óltirýge oqtalý sany ótken jylǵy sáıkes kezeńmen salystyrǵanda 15,4 paıyzǵa artty. Respýblıkada adam óltirý deńgeıi 100 myń turǵynǵa shaqqanda 4,8 qurady. Oblystar men respýblıkalyq mańyzy bar qalalar bólinisinde 100 myń adamǵa shaqqandaǵy adam óltirýdiń eń joǵary deńgeıi Pavlodar, Aqmola, Qaraǵandy, Jambyl oblystarynda, eń tómeni Shymkent qalasynda baıqalady.
