Elimizde qus sharýashylyǵy úshin jem-azyq qory qurylady
ASTANA. Qazannyń 12-si. QazAqparat /Marlan Jıembaı/ - Elimizde qus sharýashylyǵy úshin 200 myń tonna kóleminde jem-azyq qoryn qurý týraly sheshim qabyldandy. Bul týraly búgin 9 aıdy qorytyndylaǵan Úkimet otyrysynda QR Aýyl sharýashylyǵy mınıstri Aqylbek Kúrishbaev málim etti.
Sondaı-aq Úkimet tarapynan mal sharýashylyǵy salasyn qoldaý boıynsha da naqty sharalardyń qabyldanǵandyǵyn atap ótken ol: «Batys Qazaqstan, Aqtóbe, Qostanaı jáne Aqmola oblystarynyń qurǵaqshylyqtan zardap shekken sharýashylyqtaryna urǵashy iri qara maldyń basyn jáne qys mezgilinde olardyń tóldeý múmkinshilikterin saqtaýǵa Úkimet rezervinen 1,5 mlrd. teńge sýbsıdııa retinde bólindi», - dedi.
Mınıstrliktiń aqparatyna sáıkes, aǵymdaǵy jyldyń 9 aıynda mal basy sany barlyq túrleri boıynsha 3 paıyzǵa ósken. Atalǵan aralyqta et óndirý 4,1, sút 1,5, jumyrtqa 12,6 jáne qoı júni 3,6 paıyzǵa artyp otyr.
